آئی سی سی اجلاس، چیمپئنز ٹرافی کا شیڈول 48 گھنٹوں میں متوقع

چیمپئنز ٹرافی کے انعقاد کے حوالے سے آئی سی سی کا اہم اجلاس آج ہو گا۔

گزشتہ روز پاکستان کی جانب سے پش کردہ فارمولے کی بنیادی شرط مانے جانے کے بعد امید کی جا رہی ہے کہ ایونٹ کے شیڈول کا اعلان اگلے 48 گھنٹوں میں کر دیا جائےگا۔

بھارت اپنے میچز نیوٹرل وینیو پر کھیلے گا جو ممکنہ طور پر دبئی ہوسکتا ہے پی سی بی کی جانب سے پیش کیے جانے والے فارمولے کے مطابق بھارت ہائبرڈ ماڈل کے تحت 2027 تک پاکستان  کا دورہ نہیں کرے گا جبکہ پاکستان بھی اس دوران ہندوستان میں اپنا کوئی میچ نہیں کھیلے گا۔

پی سی بی کی جانب سے پیش کردہ اس فارمولے کا اطلاق آئی سی سی کے ٹورنامنٹس پر لاگو ہوگا، جس میں چیمپیئنز ٹرافی، ویمن ورلڈکپ، ٹی20 ورلڈکپ 2026 کے ایونٹ بھی اسی فارمولے کے تحت ہوں گے۔

خیال  رہے کہ اس سے قبل  5 دسمبر کو ہونے والے آئی سی سی کی بورڈ میٹنگ کے اجلاس میں چیمپئنز ٹرافی سے متعلق  کوئی فیصلہ نہ ہوسکا تھا جس کی وجہ سے ڈیڈ لاک برقرار ہے۔

واضح رہے کہ آئی سی سی چیمپئنز ٹرافی  کی میزبانی پاکستان کے پاس ہے جس کا آغاز 19 فروری 2025 میں ہونا طے ہوا تھا مگر بھارت نے روایتی ہٹ دھرمی کا مظاہرہ کرتے ہوئے اپنی ٹیم کو پاکستان بھیجنے سے انکار کر دیا ہے جس کی وجہ سے تا حال ابھی تک ٹورنامنٹ کا شیڈول طے نہیں ہو پا رہا۔