وزیر اعلی مریم نواز کا چھوٹے کاروبار کے فروغ کے لیے  "کاروبار کارڈ" متعارف کرانے کا اعلان

وزیر اعلی پنجاب مریم نواز نے چھوٹے کاروبار کے فروغ کیلئے "کاروبار کارڈ" اسکیم متعارف کرانے کا فیصلہ کیا ہے۔

وزیراعلیٰ مریم نواز کی زیر صدارت اجلاس میں درمیانے درجے کے کاروبار اور تجارتی سرگرمیوں کے فروغ کیلئے بلاسود سمال اور میڈیم لون دینے کا اصولی فیصلہ کیا گیا ہے۔

 کاروبار کارڈ اسکیم کے تحت ایک سے 10 لاکھ روپے تک قرضہ دیا جائے گا، چیف منسٹر آسان کاروبار فنانسنگ اسکیم کے تحت 5 سال تک قرض ادا کرنا ہوگا، کاروبار کارڈ ریسٹورنٹ سمیت دس ایریاز میں ادائیگی کے لئے استعمال نہیں ہوسکے گا ۔ جبکہ نوازشریف آئی ٹی سٹی میں آئی ٹی اسٹارٹ اپ کے لئے ترجیحاً لون مل سکے گا۔

چیف منسٹر آسان کاروبار فنانسنگ اسکیم کے تحت تین کروڑ تک قرضے دینے کی تجویز دی گئی ہے۔ وزیر اعلیٰ مریم نواز نے سمال اور میڈیم لون اسکیم کیلئے جامع پلان طلب کرلیا ،بڑے شہروں میں سمال اور میڈیم انڈسٹری کیلئے الگ زون مختص کرنے پر اتفاق کیا گیا۔

وزیراعلیٰ پنجاب مریم نواز نے کہا کہ پنجاب میں تجارت اور صنعت کو فروغ دے کر روزگار کے مواقع بڑھائیں گے۔