اسرائیل کی ایرانی جوہری تنصیبات پر ممکنہ حملے کی تیاریاں

اسرائیل نے شام کا دفاعی نظام تباہ کرنے کے بعد خطے کی موجود صورتحال سے فائدہ اٹھاتے ہوئے ایران پر ممکنہ فضائی  حملے کی تیاریاں شروع کردیں۔

اسرائیلی اخبار کے مطابق اسرائیلی فوجی حکام کا کہنا ہے کہ لبنان  میں ایران کے حامی گروپ حزب اللہ  کے کمزور ہونے اور شام میں بشار الااسد کی  حکومت  کے خاتمے کے بعد اسرائیلی فضائیہ ایران کی جوہری تنصیبات کے خلاف ممکنہ حملوں کے لیے اپنی تیاری جاری رکھے ہوئے ہے۔

اسرائیلی فوجی حکام کے مطابق ایران کو جوہری پروگرام کو مزید آگے بڑھانے اور بم تیار کرنے سے روکنے کے لیے ایران کی جوہری تنصیبات کو نشانہ بنانا چاہیے۔

اس سے قبل  اسرائیلی فضائیہ کی جانب سے شام میں کئے جانے والے حملوں میں شام  کے فضائی دفاعی نظام کو بری طرح نشانہ بنایا  گیا۔

اسرائیلی فوج کا خیال ہے کہ اب ایران کے جوہری مقامات پر حملہ کرنے کا موقع ہےکیونکہ  ایران اپنے جوہری پروگرام کو مزید آگے بڑھا سکتا ہے اور ایک بم تیار کر سکتا ہے۔

دوسری جانب اقوام متحدہ سیکرٹری جنرل نے اسرائیل سے حملے بند کرنے اور شام سے باہر نکلنے کا مطالبہ کیا ہے جب کہ امریکی قومی سلامتی کے مشیر جیک سلیوان نے کہا کہ اسرائیل کو ممکنہ خطرات سے نمٹنے کا حق ہے۔