پیپلز پارٹی کے بعدمسلم لیگ نون کابھی صدارتی آرڈیننس چیلنج کرنے کا اعلان

تفصیلات کے مطابق پاکستان مسلم لیگ ن کے رہنما احسن اقبال نے لاہور کی احتساب عدالت کے باہر میڈیا سے گفتگو کرتے ہوئے کہا کہ سینیٹ اوپن الیکشن کیخلاف ہم سپریم کورٹ جائیں گے، حکومت سینیٹ میں شفافیت کے نام پردھوکا دے رہی ہے ۔ عمران خان کا ایک دوست نااہل ہونے والا ہے ،   پاکستان کا آئین فرینڈز آف عمران خان کیلئے تبدیل نہیں ہوسکتا، امید ہے عدالت صدارتی ریفرنس کو واپس کر دے گی،  یہ ریفرنس  سپریم کورٹ پر دباؤ ڈالنے کی کوشش ہے. ان کا کہنا تھا کہ  دو تہائی اکثریت نہ ہونے پر آڈریننس کا اجرا جہالت کی انتہا ہے،عمران نیازی اپنے  پیاروں دوستوں کو سینیٹ میں لانا چاہتے ہیں،  اس کا تعلق صرف فرینڈ آف عمران کو این آراو دینے کیلئے ہے۔  کل حکومت 18 ویں ترمیم کے خاتمے کیلئے بھی صدارتی آرڈیننس جاری کرے گی ، کل آپ 58 ٹوبی کو بھی لانے کیلئے آرڈیننس جاری کردیں گے ۔

احسن اقبال نے مزید  کہا کہ عمران خان کو خطرہ ہے کہ ان کے لوگ دھوکہ نہ دے جائیں ،  ان کی اپنی جماعت میں بغاوت ہے   مگر عوام ان کے دھوکے میں نہیں آئیں گے۔  لیگی رہنما  کا کہنا تھا کہ عمران خان  نے ہر بات پر یوٹرن لیا ہے اس حکومت کا تیسرا سال شروع ہوچکا ہے، حکومت 3 سال میں ہمارے خلاف ایک کیس ثابت نہیں کرسکی، ہم نے قوم سے جو وعدے کیے وہ پورے کیے، عمران نیازی نے ایک کروڑ نوکریوں کا وعدہ کیا تھا، حکومت نے لوگوں کو بے روزگار کر دیا، 50 لاکھ گھروں کا وعدہ کیا تھا، 5 گھر بھی نہیں بنے۔ انہوں نے مزید کہا کہ عمران خان نے وعدہ کیا تھا کہ آٹا چینی مہنگی کروں گا ،  اس  حکومت نے ملک  میں تاریخی مہنگائی کر دی ہے ۔

واضح رہے کہ  گزشتہ روز  پاکستان پیپلز پارٹی   چئیرمین بلاول بھٹو زرداری  نے صدارتی آرڈیننس چیلنج کر نے کا اعلان کیا تھا ۔ انہوں نےکہا تھا  کہ سینیٹ الیکشن سےمتعلق صدارتی آرڈیننس سےپارلیمنٹ متنازع ہوسکتی ہے، آرڈیننس سینیٹ الیکشن میں دھاندلی کی کوشش ہے، سندھ حکومت کےذریعےصدارتی آرڈیننس کوچیلنج کریں گے،آرڈیننس سےمتعلق سپریم کورٹ میں اپناموقف رکھیں گے، ان کا کہنا تھا کہ اوپن ووٹ کےذریعےبھی مقابلہ کرنےکوتیارہیں،ہم اوپن ووٹ میں بھی حکومت کوٹف ٹائم دیں گے،حکومت کےاپنےایم این ایزاورایم پی ایزناراض ہیں، آپ کےارکان آپ کیخلاف اوپن ووٹ دینےکوتیارہیں،ہم سینیٹ الیکشن،خریدوفروخت روکنےکیلئےطریقہ کارمیں تبدیلی کیلئے بھی تیارہیں۔