ملک سے آدھی کرپشن  بھی ختم ہوجائے تو آئی ایم ایف کی ضرورت نہیں رہے گی،وزیر دفاع

وزیر دفاع خواجہ آصف  نے کہا کہ کرپشن ہماری معیشت کو دیمک کی طرح کھا رہی ہے، کرپشن 50فیصد بھی کم ہوئی تو آئی ایم ایف کی ضرورت نہیں رہے گی، اس وقت آئی ایم ایف کا پریشر ہے ملک مشکل وقت سے گزررہا ہے۔
وزیر دفاع خواجہ آصف نےسیالکوٹ میں ایوان صنعت و تجارت میں صنعتکاروں سے خطاب کرتے ہوئے کہا کہ گزشتہ ایک سال سے ملک آئی ایم ایف کے پریشر سے گزر رہا ہے لیکن ہمیں ملک کے اندر استحکام کی ضرورت ہے اور پالیسی ریٹ نو فیصد کم ہوا ہے جس سے بہتری آئے گی۔
انہوں نے کہا کہ کرپشن ہمارے ملک کو دیمک کی طرح کھارہی ہے، کسٹم کلکٹر 40،50 کروڑ روپے رشوت لیتے ہیں، حلال اور حرام کی تمیز ختم ہوچکی ہے، اللہ ہم سب کو رزق حلال کمانے کی توفیق دے۔
خواجہ آصف نے مزید کہا کہ ہم آہستہ آہستہ مایوسی کے دور سے نکل چکے ہیں لیکن اب بھی بہت سی رکاوٹیں عبور کرنی ہیں، کچھ ایسے فیصلے ہیں جو ہم اپنی مجبوریوں کی وجہ سے نہیں لے پاتے، معاشی مجبوریاں بعض اوقات تکلیف دہ ہوتی ہیں۔
خواجہ آصف نے کہا کہ ملک کو کرپشن کی بیماری کا سامنا ہے، پرویزالہٰی نے مجھے بتایا ایک بیوروکریٹ نے شادی کی سلامی میں 4 ارب کمائے،  ہمیں ملک کے اندر استحکام کی ضرورت ہے۔
خواجہ آصف نے کہا کہ گزشتہ تین چار ماہ سے مجھے پورٹ شپ کی ٹاسک فورس کا چئیرمین بنایا گیا، ایک کنٹینر کو آپریٹ کرنے کے لیے چھ گھنٹے کا وقت درکار ہوتا ہے۔ گاڑیوں سے ٹریکر اتار کر دوسری گاڑیوں کو ٹریکر لگا دیا جاتا ہے۔
انہوں نے کہا کہ ایوان صنعت و تجارت کے مسائل سے آگاہ ہوں لیکن سیالکوٹ شہر کا کلچر سامنے ہے، پرائیویٹ شراکت داری سے ایئر پورٹ اور ایئرلائن کے قیام کی مثال دنیا میں کہیں نہیں ملتی۔