ڈی ایٹ سمٹ:نوجوان ملازمت ڈھونڈنے کے بجائے ملازمتیں دینے کی جانب جائیں ،وزیر اعظم

وزیراعظم پاکستان محمد شہباز شریف کا کہنا ہے کہ ہم چاہتے ہیں کہ نوجوان  نوکری تلاش کرنے کی بجائے نوکریاں دینے کی طرف جائیں، نوجوانوں کی معاونت اور چھوٹے و درمیانے درجے کے کاروباروں ( ایس ایم ایز) کی ترقی کسی بھی معاشرے کی ترقی کے لیے اہم ہے۔

قاہرہ میں ہونے والی  ڈی ایٹ ممالک کی  سربراہی کانفرنس  اجلاس سے خطاب کرتے ہوئے وزیراعظم شہباز شریف نے کہا کہ نوجوان توانائی، نئے خیالات، اور تخلیقی صلاحیتوں سے بھرپور ہیں، ڈی ایٹ رکن ممالک کے لیے نوجوانوں کو بااختیار بنانا انتہائی اہمیت کا حامل ہے۔

اجلاس سے خطاب کرتے ہوئے شہباز شریف کا کہنا تھا کہ  نوجوانوں میں سرمایہ کاری اور چھوٹے اور درمیانے درجے کے کاروباروں کی جانب رجحان کا فروغ ہماری سماجی و اقتصادی ترقی کے لیے انتہائی اہمیت کا حامل ہے،انہوں نے مزید کہا کہ  پاکستان کی آبادی کے 60 فیصد سے زیادہ حصہ  30 سال سے کم عمر افراد پر مشتمل ہے جو کہ جدت اور ترقی میں اہم کردار ادا کرسکتے ہیں،کوشش ہے کہ نوجوان ملازمتیں ڈھونڈنے کے بجائے ملازمتیں دینے والے بنیں۔

وزیر اعظم نے کہا  کہ حکومت پاکستان اپنے فلیگ شپ یوتھ پروگرام کے ذریعے، معیاری تعلیم فراہم کرنے، روزگار کے مواقع پیدا کرنے اور  پیداواری مواقع فراہم کرنے کے لیے پرعزم ہے۔

انہوں نے کہا کہ 2013 سے اب تک اس پروگرام کے ذریعے لائق اور قابل طالب علموں میں 600,000 سے زائد لیپ ٹاپس  تقسیم کیے جا چکے ہیں اور ہزاروں اسکالرشپس دی گئی ہیں، لاکھوں نوجوانوں کومصنوعی ذہانت، ڈیٹا اینالیٹکس، اور سائبر سیکورٹی کے حوالے سے فنی تربیت فراہم کی گئی ہے۔

وزیراعظم نے کہا کہ پاکستان دنیا کے بڑے فری لانسرز والے ممالک کا گھر سمجھا جاتا ہے، ہم چاہتے ہیں کہ زراعت، معیشت اور دیگر شعبوں میں انفارمیشن ٹیکنالوجی کے ذریعے بہتری لائی جائے۔

انہوں نے مزید کہا کہ حکومت نے یوتھ بزنس اینڈ ایگریکلچر، لون سکیم کے ذریعے اربوں روپوں کے قرضے دیے ہیں جس کا مقصد نوجوان پاکستانیوں اپنے پاؤں پر کھڑا کرنا ہے، ان کا مزید کہنا تھا کہ مجھے یہ بتاتے ہوئے خوشی ہو رہی ہے کہ ہماری کابینہ نے ڈی ایٹ رکن ممالک کے ساتھ ترجیحی تجارتی معاہدے کے ساتھ ساتھ اس کے پروٹوکول کے نفاذ کی منظوری دے دی ہے۔