صیہونی فورسز کے غزہ پر حملے جاری ہیں، تازہ کارروائی میں 50 سے زائد فلسطینی شہید

صیہونی فورسز کے غزہ پر حملے جاری ہیں، تازہ کارروائی میں مزید 50 سے زائد فلسطینی شہید ہوگئے۔

غیر ملکی میڈیا رپورٹس کے مطابق اسرائیل نے غزہ میں مواصی کیمپ پر بمباری جبکہ خان یونس میں وزارت داخلہ کے ہیڈکوارٹرز پر فضائی حملہ کیا۔

اسرائیل کی جانب سے غزہ شہر میں ڈرون حملے  بھی کیے گئے، جمعرات کی صبح سے اب تک غزہ پولیس چیف محمود صلاح اور معاون حسان مصطفیٰ سمیت مزید 50 سے زیادہ فلسطینی شہید ہوگئے۔

غزہ میں شدید سردی سے ساتواں نومولود بھی شہید ہوگیا، کھلے آسمان تلے خیموں میں بے گھر فلسطینیوں کی ٹھنڈ سے اموات کی تعداد 8 ہوگئی۔

دوسری جانب غزہ جنگ کی طوالت اسرائیلی فوجیوں میں ذہنی دباؤ کا سبب بن گئی، گزشتہ سال 28 اسرائیلی فوجیوں نے خودکشی کرلی۔

ادھر اسرائیلی فوج کے مطابق ہزاروں اسرائیلی فوجیوں نے غزہ میں لڑنے سے بھی انکار کردیا ہے۔