چیمپئنز ٹرافی کے لیے آئی سی سی وفد کا نیشنل اسٹیڈیم کا دورہ

کراچی:انٹرنیشنل کرکٹ کونسل (آئی سی سی) کے 6 رکنی وفد نے چیمپئنز ٹرافی 2025ء کےانتظامات کا جائزہ لینے کے حوالے سے نیشنل اسٹیڈیم کا دورہ کیا ۔
 آئی سی سی کے 6 رکنی وفد میں براڈ کاسٹرز اور لاجسٹک کے نمائندے شامل ہیں،دورے کے دوران پی سی بی کے ڈائریکٹر انٹرنیشنل عثمان واہلہ نے وفد کو بریفنگ بھی دی۔
بریفنگ میں کہا گیا ہے کہ نیشنل اسٹیڈیم میں 25 جنوری تک کام مکمل کرنا ہے جبکہ چیمپئنز ٹرافی 19 فروری سے شروع ہو گی جو9مارچ تک جاری رہے گا۔
واضح رہے کہ چیمپئنز ٹرافی کی میزبانی پاکستان کے پاس ہے جو کہ ہائبرڈ ماڈل کے تحت پاکستان اور یواے ای میں کھیلی جائے گی،چیمپئنز ٹرافی کے میچ کراچی، لاہور،راولپنڈی اور دبئی میں ہوں گے،ایونٹ میں 8ممالک کے درمیان 15میچز کھیلے جائیں گے۔
گروپ اے میں پاکستان، بھارت،نیوزی لینڈ ،بنگلہ دیش شامل ہیں جبکہ گروپ بی جنوبی افریقا،آسٹریلیا،افغانستان اور انگلینڈ پر مشتمل ہے۔ایونٹ کا افتتاحی میچ 19فروری کو پاکستان اور نیوزی لینڈ کے درمیان کراچی میں ہوگا،پاک بھارت میچ 23فروری کو دبئی میں ہوگا،پاکستان گروپ کا تیسرا میچ 27فروری کو راولپنڈی میں کھیلے گا۔