ترکیہ :ہوٹل میں آتشزدگی سے 10 افراد ہلاک، متعدد زخمی

انقرہ: ترکیہ کے ایک ہوٹل میں آتشزدگی کے نتیجے میں 10 افراد ہلاک جبکہ 32 افراد زخمی ہو گئے۔
غیر ملکی میڈیا رپورٹس کے مطابق ترکیہ کے شمال مغربی حصے میں تالکایا نامی شہر کے ایک سیاحتی علاقے میں قائم کثیر المنزلہ عمارت میں آگ لگ گئی جس کے نتیجے میں 10 افراد ہلاک اور  32 زخمی ہوگئے۔ 
رپورٹس کے مطابق آگ 11 منزلہ عمارت کی چوتھی منز ل پر لگی جو دیکھتے ہی دیکھتے پورے ہوٹل تک پھیل گئی اور تاحال آگ پر قابو نہیں پایا جاسکا۔ 
آگ لگنے کا واقعہ رات تین بجے پیش آیا۔
اس حوالے سے ہوٹل انتظامیہ کا کہنا ہے کہ آگ لگنے کے بعد 2 افراد نے عمارت سے چھلانگ لگانے کی کوشش کی جس میں وہ ہلاک ہوگئے ،جبکہ دیگر افراد نے چادروں اور کمبلوں کا استعمال کرتے ہوئے عمارت کے کھڑکیوں سے نیچے اترنے کی کوشش کی۔
آگ لگنے کے وقت عمارت میں اس وقت 230 سے زائد افراد موجود تھے۔
 دوسری جانب ترکی کے وزیر انصاف یلماز تنک نے ریزورٹ میں آگ لگنے کی تحقیقات کے لیے چھ پراسیکیوٹرز کو تفویض کیا ہے۔ آگ لگنے کی وجہ ابھی تک معلوم نہ ہوسکی جس کی تحقیقات جاری ہیں۔