سپریم کورٹ نے سنگین غفلت پرایڈیشنل رجسٹرار جوڈیشل نذر عباس کو عہدے سے ہٹادیا

اسلام آباد؛سپریم کورٹ نےسنگین غفلت برتنے پر ایڈیشنل رجسٹرار نذر عباس کو عہدے سے ہٹا کر او ایس ڈی بنا دیا۔
سپریم کورٹ کی جانب سے جاری اعلامیے کے مطابق ایڈیشنل رجسٹرار نذر عباس سنگین غلطی کے مرتکب ہوئے،رجسٹرار سپریم کورٹ کو معاملے کو دیکھنے کی ہدایت کی گئی ہے۔
اعلامیے میں مزید کہا گیا کہ ایڈیشنل رجسٹرار جوڈیشل نےغلطی سے آئینی بینچ کا مقدمہ ریگولر بینچ کے سامنے سماعت کے لیے مقرر کیا، ایڈیشنل رجسٹرار کے ایسا کرنے سے سپریم کورٹ اور فریقین کے وقت اور وسائل کا ضیاع ہوا۔
سپریم کورٹ نے اپنے جاری کر دیہ اعلامیے میں مزید کہا کہ جسٹس منصور علی شاہ اور جسٹس عقیل عباسی نے ایڈیشنل رجسٹرار کیخلاف توہین عدالت کیس کی سماعت کی،ایڈیشنل رجسٹرار کی بیماری کی رخصت کے باعث رجسٹرار سپریم کورٹ عدالت میں پیش ہوئے،رجسٹرارنے ایڈیشنل رجسٹرار کی جانب سے مقدمات کی سماعت کیلئے تقرری میں غلطی کا اعتراف کیا ۔
رجسٹرار نے یقین دہانی کروائی معزز بینچ کے سامنے مقدمات ڈی لسٹ کرنے میں کوئی بدنیتی شامل نہیں تھی،اس کے برعکس ایڈیشنل رجسٹرار کا اقدام ریگولر بینچز کمیٹی کے احکامات کی روشنی میں تھا،سپریم کورٹ کی جانب سے ایڈیشنل رجسٹرار جوڈیشل کی برطرفی کے احکامات جاری کیے جا چکے ہیں۔