بالی وڈ اداکار سیف علی خان کو اسپتال سے ڈسچارج کر دیا گیا

ممبئی: بالی ووڈ اداکار سیف علی خان کو  لیلاوتی ہسپتال سے ڈسچارج کر دیا گیا ہے، وہ  اپنی رہائشگاہ باندرہ میں ڈکیتی کی کوشش کے دوران چاقو کے متعدد وار سے زخمی ہوئے تھے ۔
انڈین میڈیا رپورٹس کے مطابق آج کرینہ کپور خان کو ہسپتال آتے دیکھا گیا، ان کے ساتھ سیکورٹی اور پولیس کے اہلکار بھی موجود تھے ، اطلاعات ہیں کہ سیف علی خان کو ہسپتال سے ڈسچارج کر دیا گیاہے اور ان کی صحت بھی پہلے سے بہتر ہے ۔
میڈیا رپورٹس میںمزید بتا یا گیا ہے کہ اداکار کے ڈسچارج کے کاغذات 20 جنوری کی رات کو جمع کرائے گئے تھے،ڈاکٹروں کے مطابق سیف کی حالت مستحکم ہے، اور انہیں مکمل آرام کا مشورہ دیا گیا ہے تاکہ وہ مکمل طور پر صحت یاب ہو سکیں۔
 ایمرجنسی سرجری کے دوران ان کی ریڑھ کی ہڈی کے قریب سے چاقو کا ایک ٹکڑا نکالا گیا تھا تاکہ اسپائنل فلوئڈ لیکیج کو روکا جا سکے، ہسپتال نے بعد میں3 انچ لمبے تیز دھار والے اس چاقو کے ٹکڑے کی تصویر جاری کی تھی۔
واضح رہے کہ 16 جنوری 2025 کو سیف علی خان  کے گھر پر حملہ ہوا تھا جس میں اپنے خاندان کو بچانے کی کوشش کے دوران زخمی ہوئے۔ رات 2:15 بجے کے قریب گھر کے ملازم پر حملہ کرنے کے بعد چور نے سیف پر چاقو کے وار کیے، جن میں سے دو زخم ریڑھ کی ہڈی کے قریب تھے اور کافی سنگین تھے۔
 حملے کے بعد مشتبہ شخص محمد شہزاد کو ممبئی پولیس نے گرفتار تھانے منتقل کر دیا۔