اگرکمیشن نہیں بنےگا تو حکومت کیساتھ فوٹو سیشن کیلئے تو نہیں بیٹھ سکتے، چیئرمین بیرسٹر گوہر

اسلام آباد: پاکستان تحریک انصاف (پی ٹی آئی ) کے چئیر مین بیرسٹر گوہر کا کہنا ہے کہ اگر جوڈیشل کمیشن کا قیام عمل میں نہیں لایا جاتا تو حکومت کے ساتھ مزید مذاکرات یا فوٹو سیشن کے لیے نہیں بیٹھ سکتے۔
چئیرمین پی ٹی آئی بیرسٹر گوہر نےاسلام آباد میں جوڈیشل کمپلیکس کے باہر میڈیا سے گفتگو کرتے ہوئےکہا کہ سپریم کورٹ کے سامنے احتجاج سے متعلق مقدمے میں پیش ہوئے، ہمارے کئی وکلا پر دہشتگردی کے مقدمات ہوئے، جج صاحب نےکہا امید ہے آئندہ تاریخ پرکیس ختم ہوجائے گا۔
حکومت کے ساتھ جاری مذاکرات کے حوالے سے چئیرمین پی ٹی آئی نے گفتگو کرتے ہوئے کہا کہ مذاکرات ہی بہترین راستہ ہے، بڑی فراخدلی سے ہم نے مذاکرات شروع کرلیے تھے اور تحفظات کے باوجود نیک نیتی سے مذاکرات میں بیٹھے تھے،انہوںنے کہا کہ  تحریک انصاف تمام سیاسی جماعتوں کے ساتھ بات کرنا چاہ رہی تھی۔
پریس کانفرنس میں بیرسٹر گوہر نے کہا کہ ہمارے ساتھ زیادتیاں ہوئیں، ہمارا مینڈیٹ چوری ہوا تھا، بانی پی ٹی آئی اور اہلیہ بشری بی بی کو جس طریقے سے سزائیں دی گئیں سب کے سامنے ہے، ان سب چیزوں کے باوجود بانی پی ٹی آئی نے دو مطالبات پر مذاکرات کا اعلان کیا تھا۔
بیرسٹر گوہر کا کہنا تھا کہ اگر حکومت سے جاری مذاکرات کے نتیجے میں 9 مئی اور 26 نومبر کے حوالے سے کمیشن نہیں بننے جا رہا تو ہم نے حکومت کے ساتھ صرف ہیلو ہائے اور فوٹو سیشن کے لیے تو نہیں بیٹھنا تھا، بانی پی ٹی آئی کے کہنے پر ہم نے مذاکرات کو کال آف کر دیا۔
 انہوں  نے کہا ہے کہ حکومت کے پاس وقت ہے، چاہے تو ابھی کمیشن کا اعلان کر دے،ہم نے حکومت کوکہاکہ وہ 7 دن میں کمیشن بنانے یا نہ بنانے کا اعلان کریں،انہوں نے مزید کہا کہ کمیشن میں یہ بھی طےہونا تھا کہ اس میں ججزکون سے ہیں، ٹی او آرز کون سے ہوں گے لیکن حکومت کی طرف سےکچھ بھی نہیں ہوا جو ثابت کرتاہےکہ کمیشن بنانےکی نیت نہیں۔