شہبازشریف اور مریم نواز ایک دوسرے سے بہت دور جاچکے ہیں : شیخ رشید کا دعویٰ

تفصیلات کے مطابق وفاقی وزیر داخلہ شیخ رشید   نے راولپنڈی  میں  میڈیا سے بات کرتے ہوئے کہا ہے کہ پاکستان کی سیاست میں بڑا فرق ہونے جا رہا ہے ، حکومت اور اپوزیشن  مل کر الگ راہ پر چلنے والی ہے ۔ مریم نواز اور اپوزیشن لیڈر قومی اسمبلی شہبازشریف سے متعلق بات کرتے ہوئے وفاقی وزیرکاکہنا تھا کہ میں نے پہلے  ہی کہا تھا کہ م ، ش سے نکل جائے گی ،  جب میں کہتا تھا تو میرا مذاق اڑایا جاتا تھا ، آپ لوگوں کو کیسے یقین دلاؤں  کہ دونوں میں بہت بڑا فرق ہےایک شمال ہے ایک جنوب۔

قومی اسمبلی میں   پیپلز پارٹی چئیرمین بلاول بھٹو کے بیان پر بات کرتے ہوئے شیخ رشید کاکہنا تھاکہ بلاول بچہ ہے بیان دے دیتا ہےان کی باتوں کو کیا سنجیدہ لینا ہے  ۔

وزیر داخلہ شیخ رشید نے کہا کہ جموں میں ہونیوالے ڈرون حملوں میں پاکستان کا کوئی کردار نہیں ، بھارتی وزیر داخلہ کے بیان کی مذمت کرتا ہوں ،  وہ کورونا میں ناکامی کی وجہ سے ہم پر الزام لگا رہے ہیں ۔ پاکستان نے افغانستان کیلئے ہمیشہ امن کا راستہ اختیارکیا، ہم کسی ملک کے خلاف سرزمین استعمال نہیں کرتے ، کوئی بھی پاکستان کے خلاف سرزمین استعمال نہ کرے۔   ہم ساری دنیا کے ممالک کے ساتھ اچھے تعلق چاہتے ہیں ،  ہم چین سمیت امریکہ کیساتھ اچھے تعلق چاہتے ہیں ۔ 

وزیر داخلہ شیخ رشید نے آج ہونے والے اعلی سطح اجلاس کے حوالے سے کہا کہ سیاست کا مستقبل تبدیل ہونے والا ہے جہاں سیاست اب ملکی سالمیت  کی سیاست پر مبنی ہوگی ، گزشتہ 3 برس سے اپوزیشن ہماری حکومت گرانے کے لیے جدوجہد کررہی تھیں لیکن اب وہ ذہنی طور پر قبول کرچکی ہیں کہ آئندہ کے 2 برس بھی حکومت کو دیے جائیں۔

وفاقی وزیر کاکہنا تھا کہ  ساری قوم کو پہلے کہا تھا عمران خان اکثریت سے بجٹ پاس کرے گا،  کل عمران خان نے اپوزیشن کی طرف ہاتھ بڑھایا ہے ۔ہم الیکشن میں الیکٹرانک  مشینوں کی طرف جانا چاہتے ہیں ، کوئی شخص یہ نہیں چاہتا ہوگا کہ بیرون ملک پاکستانیوں کے ووٹ کو اگنور کرے ، بیرون ملک پاکستانی عمران خان کا ووٹر ہے ،بیرون ملک پاکستانی ایک کروڑ تک جائیں گے  ۔ ان کاکہنا تھا کہ عمران خان نے کہا ہے کہ الیکٹرانک ووٹنگ مشین پر آپ رضا مند نہیں تو وہ تبدیل کرنے کو بھی تیار ہیں۔

آزاد کشمیر  الیکشن  کے حوالے سے بات کرتے ہوئے  ان کاکہنا تھا کہ واحد سیاسی لیڈر ہوں جس کی مقبوضہ کشمیر میں بھی آواز سنی جاتی ہے، ساری کشمیری عوام کو کہنا چاہتا ہوں بلے کوووٹ دیں۔ جاوید بٹ کو وقت سے پہلے مبارکباد دیتے ہوں ہم الیکشن جیتیں گے ، کل شام کو ہم 5 بجے تک انتظار کریں گے کہ وہ بھی اپنے کاغذ واپس لے لیں۔