فلم ، ریڈیو ، ٹی وی اور اسٹیج کے معروف اداکار خیام سرحدی بچھڑے 14 برس بیت گئے

فلم ، ریڈیو ، ٹی وی اور اسٹیج کے معروف اداکار خیام سرحدی کی 14 ویں برسی آج منائی جارہی ہے ۔

خیام سرحدی نے 1948ء میں معروف فلمی ڈائریکٹر ضیاء سرحدی کے ہاں پیدا ہوئے، ضیاء سرحدی انہیں ڈاکٹر بنانا چاہتے تھے مگر خیام سرحدی پر اداکار اور ہدایتکار بننے کا جنون سوار تھا ۔آخر والد کو بیٹے کے شوق کے آگے ہتھیار ڈالنے پڑے۔

خیام سرحدی کے والد نے انہیں ایکٹنگ ،ڈائریکشن اور پروڈکشن کا کورس کروانے کے لیے یونان بجھوا دیا جہاں سے ڈپلومہ کرنے کے بعد تھیٹر سے وابستہ ہوگئے' جہاں کمال احمد رضوی اور نعیم طاہر سمیت دیگر تھیٹر کے معروف فنکاروں کے ساتھ کام کرتے رہے۔ انہیں اردو پڑھنی نہیں آتی تھی لیکن رومن اور انگریزی پر عبور حاصل تھا۔ اس لیے انہیں اسکرپٹ اردو رومن میں لکھ کر دیا جاتا۔ اس کے بعد ریڈیو جوائن کرلیا،جہاں سے پی ٹی وی کے پروڈیوسر یاور حیات نے ٹی وی ڈراموں میں متعارف کروایا۔

پی ٹی وی میں انہوں نے ''وارث''، ''ریزہ ریزہ''، ''من چلے کا سودا''، ''دہلیز''، ''لازوال'' ،''سورج کے ساتھ ساتھ '' سمیت ان گنت ڈرامہ سیریلز میں کام کیا۔اس کے علاوہ انہوں نے تین فلمیں ''اک سی ڈاکو''،''بوبی'' اور ''مہک'' میں کام کیا ،لیکن انہیں فلمی ماحول اچھا نہ لگا تو انہوں نے مزید فلمیں کرنے کی بجائے خود کو ٹی وی ڈراموں تک محدود کرلیا۔

وفات سے قبل وہ بھی دوسرے فنکاروں کی طرح کام کی وجہ سے کراچی میں ہی رہ رہے تھے ۔خیام سرحدی نے بانی پاکستان محمد علی جناح کے حوالے سے بننے والی فلم ''جناح'' میں سردار عبدالرب نشتر کا کردار نبھایا تھا۔ اپنے انداز کا یہ منفرد فنکار تین فروری 2011ء کو دل کا دورہ پڑنے پر جان حقیقی سے جاملے۔