پارلیمانی کمیٹی برائے قومی سلامتی کا اجلاس ، اعلامیہ جاری

تفصیلات کے مطابق  اسپیکر قومی اسمبلی و کمیٹی چیئرمین اسد قیصر کی زیر صدارت  پارلیمانی کمیٹی برائے قومی سلامتی کا   اجلاس  جار ی ہے۔ اجلاس میں آرمی چیف جنرل قمر جاوید باجوہ،ڈی جی آئی ایس آئی لیفٹیننٹ جنرل فیض حمید اور ڈی جی آئی ایس پی آر لیفٹیننٹ جنرل بابر افتخار بھی اجلاس میں شریک ہیں۔

اپوزیشن لیڈر شہباز شریف اور چیئرمین پیپلزپارٹی بلاول بھٹو زرداری بھی اجلاس میں شریک ہیں جب کہ  چاروں صوبوں کے وزیراعلیٰ بھی اجلاس میں شریک ہیں۔

جاری کردہ اعلامیے میں کہا گیا ہے کہ  داخلی سلامتی، اندرونی چیلنجز، مسئلہ  کشمیر اورافغانستان کی حالیہ صورتحال  سے متعلق   بریفنگ دی گئی ہے ،ڈی جی آئی ایس آئی نے ملک کی سیاسی وپارلیمانی قیادت، رہنماؤں اور ارکان کو  خارجہ امور بریفنگ دی ہے۔

بریفنگ میں  بتایا گیا کہ  پاکستان نے افغان امن عمل میں نہایت مثبت اورذمہ دارانہ کرداراداکیا،امید ہے افغانستان کی سرزمین بھی پاکستان کے خلاف استعمال نہیں ہوگی، پاکستان کی سرزمین افغانستان میں جاری تنازعہ میں استعمال نہیں ہو رہی، پاکستان افغان امن کیلئے اپنا ذمہ دارانہ کردار جاری رکھے گا۔

 بریفنگ میں مزید بتایا گیا کہ  پاکستان افغانستان میں عوام کی حقیقی نمائندہ حکومت کا ہر سطح پر خیر مقدم کرے گا، افغانستان میں پائیدار امن و استحکام دراصل جنوبی ایشیا میں استحکام کا باعث بنے گا،پاکستان کی کوششوں سے امریکہ اور طالبان کے درمیان  بھی بامعنی گفت و شنید کا آغاز ہوا۔