حکومت کسانوں کو تکنیکی معاونت فراہم کر کے زرعی مصنوعات بڑھانے کیلئے پرعزم ہے، وزیراعظم

اسلام آباد میں قومی کسان کنونشن سے خطاب کرتے ہوئے انہوں نے کہا کہ زرعی شعبے کی ترقی ملک کی ترقی اور خوشحالی کے لئے ضروری ہے۔وزیراعظم نے کہا کہ حکومت فی ایکڑ پیداوار میں اضافے اور پھلوں اور سبزیوں جیسی جلد خراب ہونے والی اشیاء کو محفوظ بنانے کے لئے تحقیق اور بیجوں کی ترقی پر توجہ مرکوز کر رہی ہے۔

انہوں نے کہا کہ ہمارے پاس ڈیرہ اسماعیل خان،چولستان، خیبرپختونخوا کے ضم شدہ اضلاع میں بنجر زمین کے بڑے بڑے قطعات ہیں جنہیں زرعی مقاصد کے لئے بروئے کار لایا جا سکتا ہے۔عمران خان نے کہا کہ پاکستان میں زیتون، ناشپاتی اور دیگر جدید اقسام کی کاشت کیلئے ماحول اور زمین کے سازگار حالات موجود ہیں۔

انہوں نے امیدظاہر کی کہ ملک میں زیتون کی کاشت کے فروغ کیلئے حکومت کی جانب سے کئے گئے اقدامات کی بدولت پاکستان جلد زیتون کا تیل برآمد کرنے والا ملک بن جائے گا۔وزیراعظم نے اس موقع پر زرعی نمائش کا بھی افتتاح کیا۔

کنونشن سے خطاب کرتے ہوئے غذائی تحفظ کے وزیر سید فخر امام نے کہا کہ ملک کی ترقی زرعی پیداوار میں اضافے کے بغیر ناممکن ہے۔انہوں نے کہا کہ کسانوں کو معیاری بیج کی فراہمی کے باعث ملک میں گندم اور چاول کی شاندار فصلیں ہوئیں۔وفاقی وزیر نے کہا کہ زرعی شعبے کی ترقی وزیراعظم کے ویژن کا حصہ ہے اور نئے مالی سال میں 60 ارب روپے کی خطیررقم مختص کی گئی ہے۔

فخر امام نے کہا کہ حکومت نے زرعی شعبے کی ترقی کیلئے شرح نمو کا چارفیصد ہدف مقرر کیا ہے۔اس موقع پر خطاب کرتے ہوئے وزیراعظم کے معاون خصوصی برائے غذائی تحفظ جمشید اقبال چیمہ نے وزیراعظم کو زرعی شعبے کی بہتری کے حوالے سے انقلابی منصوبے اور حکمت عملی کے بارے میں بریفنگ دی۔انہوں نے کہا کہ ملک کی تاریخ میں پہلی دفعہ پاکستان تحریک انصاف کی حکومت زرعی ترقی کے خواب کو عملی جامہ پہنائے گی۔