وفاقی حکومت کا بیرون ملک جانے والوں اور لیپ ٹاپ کے خواہش مندوں کو قرضہ دینے کا فیصلہ

اسلا م آباد:وفاقی حکومت کی جانب سے بیرون ملک جانے والوں اور لیپ ٹاپ کے خواہش مندوں کو قرضہ دینے کا فیصلہ کیا گیا ہے۔
تفصیلات کے مطابق وزیراعظم شہباز شریف نے نوجوانوں کے لیے کاروباراور زراعت قرضہ اسکیم کا دائرہ بڑھا دیا۔
اسٹیٹ بینک آف پاکستان کے مطابق وزیراعظم کی جانب سے قرضہ اسکیم کے دائرے میں توسیع کے بعد متوقع بیرون ملک جانے والی افرادی قوت اور لیپ ٹاپ کے لیے بھی قرض لیا جاسکےگا۔
نوجوانوں کو لیپ ٹاپ کےحصول کے لیے 4 سالہ قرض کائیبور پلس 3 فیصد بینک ریٹ پرمہیا ہوگا جب کہ لیپ ٹاپ ایچ ای سی کے منظور شدہ اداروں کے18سے 30 سال تک کےطلبہ لے سکیں گے۔
اسٹیٹ بینک حکام کی جانب سے بتایا گیا ہے کہ لیپ ٹاپ کے لیے  ایک لاکھ 50 ہزار، 3 لاکھ اور 4 لاکھ 50 ہزار روپے قرض دیا جائے گا جب کہ لیپ ٹاپ کی قسطیں یونیورسٹی فیس کے ساتھ ادا ہوں گی۔
اسی طرح بیرون ملک روزگار پر جانے والوں کو ٹریننگ، ویزا اور سفری اخراجات  کے لیے 10 لاکھ روپےقرض دیا جائے، قرض کا دورانیہ 5 سال اور بینک ریٹ کائیبور پلس 3 فیصد ہوگا جب کہ قرض کی فراہمی 21 سے 45 سال تک کی افرادی قوت کے لیے ہوگی۔