قومی سلامتی کمیٹی کا اجلاس، وزیر اعظم کی عدم شرکت پر بلاول بھٹو نے سوال اٹھا دیا

تفصیلات کے مطابق  قومی سلامتی کمیٹی کا اجلاس  اسپیکر قومی اسمبلی اسد قیصر کی زیر صدار ت جاری ہے۔پارلیمانی کمیٹی میں شہباز شریف، بلاول بھٹو زرداری نے عسکری قیادت سے سوالات کئے۔

ذرائع کے مطابق  اپوزیشن لیڈر شہباز شریف نے سی پیک کے مستقبل، خطے کی موجودہ صورتحال پر سوالات کئے، بلاول بھٹو زرداری نے امریکی فوج کے افغانستان سے انخلاء کے بعد کی صورتحال پر سوالات کئے ۔ پارلیمانی کمیٹی میں اب تک 4 شرکاء نے سوالات کئے ہیں ۔پارلیمانی کمیٹی کے شرکاء کا عسکری قیادت سے سوالات کا سلسلہ جاری ہے۔

قومی سلامتی کی پارلیمانی کمیٹی کے اجلاس میں عدم شرکت پر بلاول بھٹو نے سوال اٹھا دیا ۔چیئرمین پاکستان پیپلزپارٹی بلاول بھٹو زرداری کا کہنا تھا کہ اتنی اہم بریفنگ ہے وزیر اعظم عمران خان کیوں نہیں آئے،وزیر اعظم کو آج یہاں موجود ہونا چاہیئے تھا۔

بلاول بھٹو کی جانب سے وزیراعظم کی عدم موجودگی کا نکتہ اٹھانے پر فوجی قیادت نے جواب دیا۔

ذرائع کے مطابق عسکری قیادت نے  جواب دیا کہ  ہمیں تو بتایا گیا ہے کہ اپوزیشن نہیں چاہتی کہ وزیراعظم ایوان میں آئیں ۔جس پر بلاول بھٹو نے کہا کہ  قومی سلامتی کا معاملہ ہے،وزیراعظم کو قیادت کرنا چاہئیے تھی۔

ذرائع کے مطابق  تین حکومتی اراکین نے بھی وزیراعظم کے  معاملے پر عسکری قیادت کو حکومتی موقف کی تصدیق کردی۔