چیمپئنز ٹرافی سے قبل قومی ٹیم کو بڑا دھچکا،اہم کھلاڑی ٹورنامنٹ سے باہر

لاہور:آئی سی سی چیمپئنز ٹرافی سے قبل قومی ٹیم کو بڑا دھچکا لگا ہے،پاکستان کہ مایہ ناز اوپنر بلے باز صائم ایوب 10 ہفتوں کے لیے کرکٹ سے آؤٹ ہو گئے۔
جنوبی افریقا کے خلاف ٹیسٹ سیریز کے دوران ٹخنے کی انجری کا شکار ہونے والے پاکستان کے جارح مزاج نوجوان بیٹر صائم ایوب 10 ہفتوں کے لیے کرکٹ سے آؤٹ ہو گئے۔
پاکستان کرکٹ بورڈ (پی سی بی) کی جانب سے صائم ایوب کی انجری کے حوالے سے اپ ڈیٹ جاری کی گئی ہے جس میں بتایا گیا ہے کہ صائم ایوب 10 ہفتوں کے لیے کرکٹ سے باہر رہیں گے۔
پی سی بی کی جانب سے جاری کردہ اعلامیے کے مطابق ڈاکٹرز نے ایم آر آئی اسکین ایکسریز اور میڈیکل رپورٹس کے بعد صائم ایوب کو 10 ہفتوں تک آرام کا مشورہ دیا۔
اعلامیے میں مزید بتایا گیا ہے کہ صائم ایوب پہلے سے بہتر محسوس کر رہے ہیں تاہم ان کی دورہ نیوزی لینڈ کے لیے دستیابی ان کی فٹنس سے مشروط ہو گی، اس دوران صائم ایوب بدستور اپنا ری ہیب انگلینڈ میں جاری رکھیں گے۔
یاد رہے کہ پاکستان اور نیوزی لینڈ کے درمیان وائٹ بال سیریز 16 مارچ سے 5 اپریل تک کھیلی جائے گی۔
واضح رہے کہ صائم ایوب کو 3 جنوری کو جنوبی افریقا کے خلاف ٹیسٹ میچ کے دوران فیلڈنگ کرتے ہوئے ٹخنے کی انجری ہوئی تھی،جس کے بعد سے اب تک ان کا علاج جاری ہے، صائم ایوب کو چیمپئنز ٹرافی کے ابتدائی اسکواڈ میں تو شامل نہیں کیا گیا تھا تا ہم اس امید کا اظہار کیا جارہا تھا کہ اگر صائم ایوب 12 فروری سے قبل مکمل صحت یاب ہو جاتے ہیں تو ان کے اسکواڈ میں شامل ہونے کے واضح امکان ہے۔