چیمپئنز ٹرافی کے لیے قومی کرکٹ ٹیم کی نئی آفیشل کٹ کی رونمائی کر دی گئی

لاہور:آئی سی سی چیمپئنز ٹرافی کے لیے پاکستان کرکٹ ٹیم کی نئی آفیشل کٹ کی رونمائی کردی گئی۔
وزیر اعظم شہباز شریف نے لاہور میں نو تعمیر شدہ قذافی اسٹیڈیم کا افتتاح کر دیا، جس کے بعد جاری تقریب میں کھلاڑیوں نے کٹ کی رونمائی کر دی گئی۔
افتتاحی تقریب کے دوران قومی کرکٹ ٹیم کے تمام کھلاڑیوں نے سٹیج پر آکر کٹ کی رونمائی کی، قومی کرکٹ ٹیم کی آفیشل کٹ میں شرٹ میں ہلکا سبز رنگ نمایاں ہے جبکہ ٹراؤزر گہرے سبز رنگ کا ہے۔
کٹ کی تقریب رونمائی کے موقع پر قومی ٹیم کے کپتان محمد رضوان نے گفتگو کرتے ہوئے کہا کہ ہمارے احساسات بہت اچھے ہیں، جب ہم اپنے کراؤڈ میں کھیلتے ہیں تو جذبہ ہی کچھ اور ہوتا ہے۔ ہمیں لاہور میں جذبہ ملتا ہے، ہمیں امید ہے کہ اسی طرح سپورٹ ملے گی۔
قومی کرکٹ ٹیم کے مایہ ناز بلے بازبابر اعظم نے بات کرتے ہوئے کہا کہ آپ سب کو مبارکب ہو کہ نیا اسٹیڈیم بنا، لاہور میں ہم جب بھی کھیلتے ہیں، ہمیں بہت زیادہ سپورٹ ملتی ہے،شاہین شاہ آفریدی کا کہنا تھا کہ لاہوریوں نے ہمیشہ ہی سپورٹ کیا ہے، ہمیں اس سیریز اور پوری چیمپئنز ٹرافی میں یہی سپورٹ چاہیے ہو گی، ہمارے لیے دعا کریں، یہ چیمپئنز ٹرافی پاکستان کی ہے۔ ان کا کہنا تھا کہ نئے اسٹیڈیم کے ساتھ نئی میموریز بنائیں گے۔
واضح رہے کہ آئی سی سی چیمپئنز ٹرافی 19 فروری سے شروع ہو رہی ہےجو کہ ہائبرڈ ماڈل کے تحت پاکستان اور متحدہ عرب امارات (یواے ای)میں کھیلی جائیگی۔
 میزبان پاکستان اپنی چیمپئینز ٹرافی 2025 کی مہم کا آغاز اسی روز کراچی میں نیوزی لینڈ کے خلاف میچ سے کرے گا، بعدازاں انہیں 23 فروری کو دبئی میں روایتی حریف بھارت کا چیلنج درپیش ہوگا۔