کراچی میں بڑھتے حادثات کے تدارک کےلئے شہر میں ڈمپرز کے داخلے پر پابندی

سندھ حکومت نے دن کے اوقات میں شہر میں ڈمپرز کے داخلے پر پابندی کا فیصلہ کر لیا، ڈمپرز کو رات 11 سے صبح 6 بجے تک شہر میں داخلے کی اجازت ہوگی۔

وزیر اعلیٰ سندھ کی ہدایت پر چیف سیکرٹری سندھ نے ٹریفک حادثات کے حوالے سے ہنگامی اجلاس کا انعقاد کیا، اجلاس میں آئی جی سندھ، کمشنر کراچی، ایڈیشنل آئی جی کراچی، سیکرٹری ٹرانسپورٹ، ڈی آئی جی ٹریفک سمیت دیگر نے شرکت کی۔

اجلاس میں سندھ سالڈ ویسٹ مینجمنٹ بورڈ کو 3 ماہ کے اندر آپریشن رات کے ٹائم شفٹ کرنے کا حکم دیا گیا، شہر میں چلنے والی تمام بڑی گاڑیوں اور ان کے ڈرائیورز کی فزیکل ویری فکیشن کا فیصلہ کیا گیا۔شہر میں چلنے والی تمام گاڑیوں کو محکمہ ٹرانسپورٹ سے کیو آر کوڈ لگا سرٹیفکیٹ ہونا چاہئے، چیف سیکرٹری سندھ نے واٹر بورڈ کے تمام واٹر ٹینکرز کی ایک ماہ میں انسپکشن کی ہدایت کی۔

انہوں نے موٹر سائیکل سواروں کو ہیلمٹ پہننے، ٹریفک پولیس کو انفورسمنٹ بڑھانے کی ہدایت کی، چیف سیکرٹری سندھ نے محکمہ اطلاعات کو ٹریفک قوانین اور آگاہی کے لئے میڈیا پر مہم چلانے کی بھی ہدایت کی۔

چیف سیکرٹری سندھ نے کہا کہ لاپرواہی سے ڈرائیونگ کرنے والوں کے خلاف چالان کے ساتھ ایف آئی آر درج کی جائے، حادثات کی سب سے بڑی وجہ ہیوی ٹریفک کی جانب سے بنائے گئے قانون پرعملدرآمد نہ ہونا ہے۔

سندھ حکومت نے صوبے میں وہیکل انسپکشن اینڈ سرٹیفکیشن سسٹم (VICS) شروع کرنے کا فیصلہ کیا، چیف سیکرٹری سندھ نے محکمہ ٹرانسپورٹ کو وہیکل انسپکشن اینڈ سرٹیفکیشن سسٹم شروع کرنے کا حکم دے دیا۔

اجلاس میں ٹریفک پولیس کی جانب سے آگاہی دی گئی کہ شہر میں چلنے والی گاڑیوں میں 65 فیصد موٹر سائیکل ہیں، 55 فیصد حادثات موٹر سائیکل سوار کے ہوتے ہیں، جس پر چیف سیکرٹری سندھ نے ڈی آئی جی ٹریفک کو ایک ماہ کے اندر ٹریفک حالات بہتر کرنے کا حکم دیا۔

چیف سیکرٹری سندھ نے ڈی آئی جی ٹریفک کو ہدایت کی کہ تمام اقدامات کے پیش نظر ٹریفک قوانین پر سختی سے عملدرآمد کروایا جائے، ٹریفک چالان کو بھی 4 گنا بڑھایا جائے۔