آئی ایم ایف وفد کی چیف جسٹس یحییٰ آفریدی سے ملاقات، عدالتی نظام واصلاحات پر مشن کو بریفنگ

اسلام آباد:پاکستان سپریم کورٹ کے چیف جسٹس یحیی آفریدی سےعالمی مالیاتی ادارے( آئی ایم ایف) وفد کی ملاقات ہوئی۔
سپریم کورٹ ذرائع کے مطابق چیف جسٹس یحیی آفریدی سے آئی ایم ایف وفد نے ملاقات کی، ملاقات تقریباً ایک گھنٹہ جاری رہی۔
 دوران ملاقات چیف جسٹس نے آئی ایم ایف وفد کو عدالتی نظام اور اصلاحات سے متعلق بریفنگ دی، ججز تقرری اور آئینی ترمیم پر بھی وفد سے تبادلہ خیال کیا گیا۔ ملاقات کے بعد آئی ایم ایف کا 6 رکنی وفد سپریم کورٹ سے روانہ ہوگیا۔
اس سے قبل آئی ایم ایف تکنیکی وفد نے کابینہ ڈویژن، پی ایم آفس، وزارت خزانہ اور وزارت قانون میں ملاقاتیں کیں، اس دوران آئی ایم ایف نے سرکاری افسران کے اثاثے ڈیکلیئریشن کیلئے مزید مہلت کی درخواست مسترد کی۔
دوسری جانب ذرائع کا کہنا ہے کہ سرکاری افسران کے اثاثوں کو ڈیکلیئر کرنے کیلئے مسودے پر مشاورت شروع کر دی گئی ہے، سول سرونٹ ایکٹ سے ترمیمی ڈرافٹ فروری میں ہی آئی ایم ایف کو فراہم کیا جائے گا۔