ہمیں ایسے میڈیا کی ضرورت ہے جو سماجی مسائل پر روشنی ڈالے ، وفاقی وزیر اطلاعات

وفاقی وزیر اطلاعات عطاءاللہ تارڑ نے کہا کہ ہمیں ایسے میڈیا کی ضرورت ہے جو سماجی مسائل پر روشنی ڈالے اور لوگوں کو اپنی بات کہنے کا موقع فراہم کرے۔

وفاقی وزیر اطلاعات عطاءاللہ تارڑ نے ریاض میں سعودی میڈیا فورم 2025  کے زیر اہتمام مباحثے میں اظہار خیال کرتے ہوئے کہا کہ سعودی عرب میں وژن 2030کے تحت رونما ہونے والی تاریخی تبدیلیوں کا مشاہدہ کر کے خوشی ہوئی، وژن 2030 ایک خواب نہیں بلکہ عملی شکل اختیار کر چکا ہے۔

وفاقی وزیر اطلاعات نے کہا کہ پاکستان کی 24 کروڑ آبادی میں سے 18 کروڑ افراد انٹرنیٹ استعمال کرتے ہیں، پاکستان کی آبادی کا 60 فیصد حصہ 30 سال سے کم عمر نوجوانوں پر مشتمل ہے۔

عطاءاللہ تارڑ نے کہا کہ سعودی ولی عہد شہزادہ محمد بن سلمان کی قیادت میں ایک عظیم انقلاب آ چکا ہے، پاکستان میں میڈیا کو جدید تقاضوں سے ہم آہنگ کیا جا رہا ہے، ہم الیکٹرانک، پرنٹ اور ڈیجیٹل میڈیا پر کام کر رہے ہیں۔

 وفاقی وزیر اطلاعات کا یہ بھی کہنا ہے کہ میڈیا کے عالمی اداروں کے ساتھ شراکت داری مفید اور مثبت قدم ثابت ہو سکتی ہے، پاکستان میں باصلاحیت افراد موجود ہیں۔

عطاءاللہ تارڑ نے کہا کہ ہم دریائے سندھ کے کنارے بسنے والی ایک قدیم تہذیب کے امین ہیں، پاکستانی ایک متحرک اور پرجوش قوم ہے جو کے ٹی جیسی بلند چوٹیوں کی محافظ ہے، ٹیلنٹ اور ہنر کی پہچان بہت ضروری ہے۔

وفاقی وزیر اطلاعات نے کہا کہ تنہائی ترقی کی راہ میں سب سے بڑی رکاوٹ ہے، ترقی کیلئے تعاون بہت ضروری ہے، پاکستان کے پاس بہترین نیوز چینلز، تفریحی چینلز، فلم سازی اور دستاویزی فلمیں بنانے کی بھرپور صلاحیت موجود ہے، اب وقت آ گیا ہے کہ نئے معاہدے کئے جائیں، اشتراک بڑھائیں اور عالمی میڈیا پر اپنی شناخت بنائیں، بین الاقوامی تعاون سے نہ صرف مواقع بڑھتے ہیں بلکہ انسانی ترقی بھی ممکن ہوتی ہے۔

عطاءاللہ تارڑ نے کہا کہ آسکر ایوارڈ یافتہ شرمین عبید چنائے، نوبل انعام یافتہ ملالہ یوسفزئی اور ثمینہ بیگ جیسی خواتین پاکستان کا فخر ہیں، ثمینہ بیگ واحد خاتون کوہ پیما ہیں جنہوں نے ماﺅنٹ ایورسٹ اور کے ٹو سمیت دنیا کی سات بلند ترین چوٹیوں کو سر کیا۔