ملکی سطح پر"کامیاب پاکستان" پروگرام شروع کرنے کا اُصولی فیصلہ

جی  این این  کے مطابق وزیرخزانہ شوکت ترین کی سربراہی میں کامیاب پاکستان پروگرام سے متعلق اجلاس ہو ا، جس میں معاون خصوصی عثمان ڈار، نیشنل بینک کے سربراہ اور اعلی حکام نے شرکت کی ۔ اجلاس میں کامیاب پاکستان پروگرام رواں ماہ لانچ کرنے کا اصولی فیصلہ  ہوگیا،  جس کے تحت ہاؤسنگ منصوبے، اسکل ڈویلپمنٹ اور آسان قرضوں کو کامیاب پاکستان کے بینر تلے ‏لایا جائیگا جبکہ ہیلتھ کارڈز اور زرعی خدمات کو بھی کامیاب پاکستان پروگرام کا حصہ بنایا جائیگا ۔

اس سلسلے میں وزیر خزانہ شوکت ترین کاکہنا ہے کہ  5 لاکھ روپے تک بغیر سود قرضہ دیا ‏جائیگا، نچلے طبقے کے 40لاکھ خاندان کو کامیاب پاکستان پروگرام میں شامل کریں گے۔ انہوں نے کہاکہ کسانوں کو سود کے بغیر قرض اور کاروبار کیلئے مالی مدد دیں گے جبکہ صوبوں کے عوام کو یونیورسل ہیلتھ انشورنس میں شامل کیا جائیگا۔

اس حوالے سے معاون خصوصی برائے اُمور نوجوانان عثمان ڈار نے کہا ہے کہ "کامیاب پاکستان"  حکومت کا فلاحی ایجنڈے پر مشتمل سب سے بڑا پروگرام ہو گا جس کے تحت  حکومت ہر خاندان میں سے 1 فرد کو ٹیکنیکل ایجوکیشن دے گی،  جبکہ منصوبے کے ذریعے ملک بھر کی عوام کوکم لاگت کی ہاوسنگ اسکیم میں شامل کیا ‏جائیگا۔ معاون خصوصی نے مزید کہا کہ مائیکروفنانسنگ کے ذریعے نچلے طبقے کی مدد کا طریقہ کار بھی طے ہو گا،وزیراعظم نے ملک گیر سطح پر عوامی فلاح کے اقدامات کی ہدایت کی ہے۔ اس پروگرام سے نوجوانوں اور کسانوں کے ساتھ ساتھ ہر پاکستانی منصوبے سے براہ راست فائدہ اٹھا ‏سکے گا۔ ان کا کہنا تھا کہ وزیر خزانہ سے مشاورت مکمل کر لی ہے، پروگرام چند دنوں میں لانچ کر دیا جائیگا۔