کراچی: ملیر سے کالعدم تنظیم بلوچ ریپبلکن آرمی کا دہشت گرد گرفتار، اسلحہ برآمد

کراچی کے علاقے ملیر میں رینجرز اور محکمہ انسداد دہشتگردی (سی ٹی ڈی) نے مشترکہ کارروائی کرتے ہوئے کالعدم بلوچ تنظیم بلوچ ریپبلکن آرمی (بی آر اے) کے دہشت گرد کواسلحے سمیت گرفتار کرلیا ۔
تفصیلات کے مطابق محکمہ انسداد دہشت گردی (سی ٹی ڈی) اور رینجرز نے ملیر میں مشترکہ کارروائی کی جس کے نتیجے میں سیکیورٹی فورسز کے خلاف عسکری کارروائیوں میں ملوث بلوچ ریپبلکن آرمی کا دہشت گرد گرفتار کرلیا گیا۔
سی ٹی ڈی حکام کے مطابق بلوچستان کے رہائشی انتہائی مطلوب ملزم زبیر احمد عرف زبیو سے اسلحہ بھی برآمد کرلیا گیا۔
 ملزم نے 2016 میں بی آر اے کے کمانڈر زرین عرف کرنٹ کے گروپ میں شمولیت اختیار کی تھی، ملزم نے انکشاف کیا کہ اس نے 2016 میں ساتھیوں کےساتھ مند بھلو ایف سی چیک پوسٹ تمپ گریڈاسٹیشن پر حملہ کیا تھا۔
 ایف سی کیمپ اور رود بن ایف سی چیک پوسٹ پر راکٹ لانچر اور بھاری ہتھیاروں سے حملے کا بھی اعتراف کیا۔
سی ٹی ڈی کے مطابق ملزم 2016 سے 2019 تک بلوچستان میں انتہائی سرگرم رہا جب کہ ملزم گرفتاری سے بچنے کے لیے 2020 میں بیرون ملک فرار ہوا تھا۔