پرتشدد رویئے قوم اور ملک کیلئے باعث شرم ہیں، خواجہ آصف

سیالکوٹ: وزیر دفاع خواجہ آصف نے کہا ہے کہ پُرتشدد رویئے قوم اور ملک کے لیے باعث شرم ہیں۔
وزیر دفاع خواجہ آصف نے سیالکوٹ میں تقریب سے خطاب کرتے ہوئے کہا کہ پاکستان میں تمام لوگ مذہبی یگانگت اور رواداری کے ساتھ ایک دوسرے کے ساتھ رہ رہے ہیں۔ شہر سیالکوٹ تمام دنیا کی سکھ برادری کے لیے بین الاقوامی سطح رکھتا ہے، اور اس مٹی پر ہم سب کا بلاتفریق حق ہے۔
خواجہ آصف نے کہا کہ ہمارے پہلے اسپیکر ہندو تھے۔ اور جسٹس کارنیلئس ہمارے چیف جسٹس رہ چکے ہیں۔ جن چیف جسٹس صاحبان پر کوئی انگلی نہیں اٹھا سکتا جسٹس کارنیلئس ان میں سرفہرست تھے،انہوں نے مزیدکہا کہ ہمارا مذہب بردباری سکھاتا ہے جو مذہب کا بنیادی جز ہے۔ لیکن ہمارے ملک میں وقتاً فوقتاً پرتشدد واقعات نظر آتے ہیں جو ہماری بدقسمتی ہے۔
 قائد اعظم کا پہلا خطبہ اقلیتی برادری کو مساوی حقوق کی فراہمی پر منحصر تھا،انہوں نے کہا کہ یہاں تمام پاکستانیوں کو یکساں حقوق میسر ہونے چاہیئیں۔ مذہب اور نسل کے نام پر کوئی تفریق نہیں ہونی چاہیئے۔
خواجہ آصف نے کہا کہ ماضی میں پنجاب میں اقلیتوں کا محکمہ فارغ تھا۔ لیکن وزیر اعلیٰ پنجاب کی خصوصی کاوشوں سے اب یہ محکمہ اقلیتی برادری کے حقوق کے لیے کوشاں ہے، پنجاب حکومت اقلیتوں کے لیے جو کام کر رہی ہے وہ خوش آئند ہے۔ ہمارا مذہب سکھاتا ہے تمام اقلیتیں ہنسی خوشی رہیں۔ اور ہم اس ملک کو مذہبی منافرت سے پاک کریں گے۔