پاکستان میں ڈیجیٹل پرائز بانڈز کی تیاری مکمل ، ایف اے ٹی ایف کی شرائط کے مطابق فریم ورک تیار

پاکستان میں ڈیجیٹل پرائز بانڈز کی تیاری مکمل کرلی گئی ہے جب کہ ایف اے ٹی ایف کی شرائط کے مطابق فریم ورک بھی تیار کیا گیا ہے۔

پاکستان کے قومی بچت ڈائریکٹوریٹ نے جدید ڈیجیٹل پرائز بانڈز کے لیے کام مکمل کر لیا ہے اور اس پر آئی ایم ایف وفد کو بھی بریفنگ دی گئی ہے ، ذرائع کے مطابق ڈیجیٹل پرائز بانڈز کے لیے ایک موبائل ایپ تیار کی گئی ہے جس کے ذریعے قومی بچت کے اکاؤنٹس ہولڈرز بھی ان بانڈز میں سرمایہ کاری کرسکیں گے۔

قانون سازی کے تحت ڈیجیٹل پرائز بانڈز کو محفوظ ترین سرمایہ کاری بنایا جائے گا اور جعلی بانڈز کے خلاف سخت حفاظتی تدابیر اور چوری کی روک تھام کے لیے نئے رولز مرتب کیے جائیں گے۔

قومی بچت ڈائریکٹوریٹ کے ذرائع کے مطابق ڈیجیٹل پرائز بانڈز میں 500، 1000، 5000 اور 10,000 روپے کے بانڈز جاری کیے جائیں گے اور ان میں 800 سے 1000 ارب روپے کی سرمایہ کاری متوقع ہے۔

واضح رہے کہ پاکستان میں ڈیجیٹل پرائز بانڈز کی آمد سے سرمایہ کاروں کو نئی سرمایہ کاری کے مواقع ملیں گے اور یہ ایف اے ٹی ایف کی شرائط کے مطابق محفوظ سرمایہ کاری کے نظام کا حصہ بنیں گے۔

یہ بانڈز قومی بچت کی اکاؤنٹس ہولڈرز کے لیے خصوصی طور پر دستیاب ہوں گے جب کہ ڈیجیٹل پرائز بانڈز کے رولز کو کابینہ کمیٹی برائے قانون سازی کو بھیج دیا گیا ہے۔