پنجاب سمیت ملک کے مختلف حصوں میں بارش کا سلسلہ جاری، بالائی علاقوں میں برفباری

لاہور: پنجاب سمیت ملک کے بیشتر حصوں میں بارشوں کا سلسلہ جاری ہے جبکہ ملک کے بالائی علاقوں میں برفباری سے سردی کی شدت میں اضافہ ہوگیا ہے۔
محکمہ موسمیات کے مطابق ملک کے مختلف اضلاع میں بارش کا سلسلہ جاری ہے ، بالائی علاقوں میں برفباری سے جاتی سردی ایک بار پھر لوٹ آئی ، پنجاب میں موسلا دھار بارش اور شدید ژالہ باری ہوئی۔
ملک کے بالائی علاقوںجن میں سوات ، مینگورہ ، مالم جبہ اور دیگر علاقوں میں بھی بادل برسے جبکہ کالام ، وادی کاغان اور مہوڈنڈ کے پہاڑوں پر ہلکی برفباری ہوئی۔
فیصل آباد میں گرج چمک کے ساتھ بادل خوب برسے، ژالہ باری سے گلیاں سفید ہوگئیں، مری میں بارش سے سردی میں اضافہ ہوگیا، قصور،چکوال، اٹک، گجرات، جہلم، اوچ شریف میں بھی ابر رحمت ہوئی، بعض علاقوں میں ژالہ باری سے فصلوں کو نقصان پہنچا۔
محکمہ موسمیات کے مطابق اسلام آباد، راولپنڈی، لاہور سمیت پنجاب کے مختلف شہروں، مری، چترال، مانسہرہ، ایبٹ آباد سمیت خیبرپختونخوا کے مختلف اضلاع، بلوچستان کے شمالی اضلاع، بالائی سندھ اور کشمیر میں چند مقامات پر بارش کا امکان ہے۔
دوسری جانب صوبائی دارالحکومت کراچی میں موسم نسبتاًگرم ہے، محکمہ موسمیات کے مطابق شہر قائد کا موجودہ درجہ حرارت 26ڈگری سینٹی گریڈ ہے، جبکہ لاہور شہر کا مطلع جزوی طور پر ابر آلود ہے۔24 گھنٹوں کے دوران بارش برسنے کا امکان موجود ہے ۔