بدین :زمین کے تنازع پر مسلح تصادم، 5 افراد جاں بحق، 7 زخمی

بدین: صوبہ سندھ کے ضلع بدین میں زمین کے تنازع پردو مسلح گروپوں کے درمیان تصادم سے 5 افراد جاں بحق جبکہ 7 زخمی ہو گئے۔
 پولیس حکام کے مطابق یہ افسوسناک واقعہ بدین کے قصبے گولارچی کے نواحی علاقے کھورواہ کے قریب پیش آیا جہاں زمین کے تنازع پر دو گروپوں میں تصادم کے دوران فائرنگ، کلہاڑیوں، ڈنڈوں اور پتھروں کا آزادانہ استعمال کیا گیا، جس کے نتیجے میں 5 افراد جاں بحق اور 7 زخمی ہوگئے۔
پولیس کا کہنا ہے کہ ، جھگڑا راہموں اور خاصخیلی گروپ کے درمیان ہوا، جس میں راہموں گروپ کے 4 افراد جاں بحق اور 2 زخمی ہوئے، جبکہ خاصخیلی گروپ کا ایک فرد جاں بحق اور 5 زخمی ہوئے۔
واقعے کی اطلاع ملتے ہی کھورواہ اور گولارچی پولیس موقع پر پہنچ گئی اور زخمیوں کو فوری طور پر تعلقہ اسپتال منتقل کر دیا گیا۔
دوسری جانب پولیس نے علاقے کو گھیرے میں لے کر مزید تحقیقات شروع کر دی ہیں۔