نیوزی لینڈ سے بدترین شکست ،پاکستان نے اپنی ٹی 20 تاریخ کا بدترین ریکارڈ بنا ڈالا

کرائسٹ چرچ:پاکستان کرکٹ ٹیم نے نیوزی لینڈ کے خلاف پہلے میچ میںبدترین شکست کے ساتھ اپنی ٹی 20 تاریخ کا بدترین ریکارڈ قائم کر دیا۔
اتوار کو کرائسٹ چرچ میں نیوزی لینڈ نے پہلے ٹی 20 میچ میں پاکستان کو آؤٹ کلاس کرتے ہوئے 9 وکٹوں سے شکست دی۔
پاکستان کی جانب سے دیا گیا 92 رنز کا ہدف کیویز نے با آسانی ایک وکٹ کے نقصان پر گیارہویں اوور میں حاصل کر لیا۔
پاکستان نے اس بری شکست کے ساتھ اپنی ٹی ٹوئنٹی تاریخ کا بدترین ریکارڈ بھی بنا دیا۔ کیویز نے گرین شرٹس کا ہدف مقررہ 20 اوورز سے 59 گیندوں پہلے ہی حاصل کیا، یہ گیندوں کے اعتبار سے ٹی ٹوئنٹی انٹرنیشنل کی تاریخ میں پاکستان کی بدترین شکست ہے۔
اس سے قبل 2018 میں آسٹریلیا نے ٹی 20 انٹرنیشنل میں پاکستان کے خلاف ہدف 55 گیندیں قبل حاصل کیا تھا۔
واضح رہے کہ پاکستان کی ٹی 20 انٹرنیشنل میں ہدف کا تعاقب کرتے ہوئے بدترین شکست بھی نیوزی لینڈ کے خلاف ہی ہوئی تھی، جب 2016 میں ویلنگٹن میں 196 رنز کے ہدف کے تعاقب میں پاکستانی ٹیم 101 رنز پر ڈھیر ہو گئی تھی اور 95 رنز سے شکست کا سامنا کرنا پڑا تھا۔