وزیر اعلی سرفراز بگٹی کا ریاست مخالف پروپیگنڈے میں ملوث سرکاری ملازمین کے خلاف کارروائی کا اعلان

کوئٹہ:وزیر اعلی بلوچستان سرفراز بگٹی نےکہا ہے کہ ریاست مخالف پروپیگنڈے میں ملوث سرکاری ملازمین کے خلاف سخت کارروائی کی جائے گی۔
تفصیلات کے مطابق کوئٹہ میں وزیر اعلیٰ بلوچستان کی زیر صدارت اعلیٰ سطحی اجلاس منعقد ہوا، جس میں انتظامی افسران نے شرکت کی۔ اجلاس کا آغاز جامِ شہادت نوش کرنے والے جوانوں کے لیے دعا اور فاتحہ خوانی سے کیا گیا،اجلاس میں فیصلہ کیا گیا کہ ریاست مخالف پروپیگنڈے میں ملوث سرکاری ملازمین کے خلاف سخت کارروائی کی جائے گی۔
دوران اجلاس وزیر اعلیٰ بلوچستان سرفراز بگٹی نے کہا کہ صوبے کے تمام تعلیمی اداروں میں قومی ترانہ پڑھا جائے گا اور پاکستان کا قومی پرچم لہرانا لازمی ہوگا،انہوں نے واضح کیا کہ اگر کسی ادارے کا سربراہ ان احکامات پر عملدرآمد نہیں کرا سکتا تو وہ اپنے عہدے سے مستعفی ہو جائے۔
وزیر اعلیٰ سرفراز بگٹی نے کہا کہ امن و امان کی بحالی حکومت کی اولین ترجیح ہے، اور کسی بھی شاہراہ کو بند کرنے کی اجازت نہیں دی جائے گی۔
انہوں نے مزید کہا کہ ریاست کے خلاف بیانیہ اپنانے والے افسران کے خلاف سخت کارروائی عمل میں لائی جائے گی، چیک پوسٹوں پر بھتہ خوری کو ناقابل قبول قرار دیتے ہوئے کہا کہ ریاست مخالف عناصر کا ہر سطح پر ڈٹ کر مقابلہ کیا جائے گا۔
اجلاس سے خطاب کرتے ہوئے انہوںنے مزیدکہا کہ آئینی حلف کی پاسداری لازمی ہے اور ریاست مخالف عناصر کے سامنے جھکنا کسی صورت قابل قبول نہیں، بلوچستان کی ثقافتی روایات امن و بھائی چارے کی علامت ہیں، اور یہاں معصوم مزدوروں اور مسافروں کے قتل کا تصور بھی نہیں کیا جا سکتا۔
وزیر اعلی سرفراز بگٹی نے اس بات پر زور دیا کہ بلوچ نوجوانوں کو لاحاصل جنگ میں دھکیلا جا رہا ہے، جسے روکنا ضروری ہے،انہوں نے میرٹ کی بالادستی پر بھی زور دیتے ہوئے کہا کہ نوجوانوں کا ریاست پر اعتماد بحال کرنا حکومت کی اہم ذمہ داری ہے۔