امریکا نے چین پر 20 فیصد لیوی کی مد میں ٹیرف بڑھا کر 145 فیصد کردیا

وائٹ ہاؤس نے تصدیق کی ہے کہ چین سے درآمد ہونے والی مصنوعات پر مجموعی امریکی ٹیرف اب 145 فیصد تک پہنچ چکا ہے۔

صدر ڈونلڈ ٹرمپ نے گزشتہ روز اعلان کیا تھا کہ وہ چینی مصنوعات پر ٹیرف کو 125 فیصد تک بڑھا رہے ہیں، تاہم اب وائٹ ہاؤس نے وضاحت کی ہے کہ یہ اعداد و شمار پہلے سے موجود 20 فیصد ٹیرف کو شامل کیے بغیر دیے گئے تھے۔

وائٹ ہاؤس کے مطابق 125 فیصد کا نیا ٹیرف صرف جوابی ٹیرف کے طور پر عائد کیا گیا  جو کہ اس 20 فیصد اضافی ٹیرف کے علاوہ ہے جو چین پر پہلے ہی نافذ کیا جا چکا ہے۔ یہ ابتدائی 20 فیصد ٹیرف چین پر فینٹینیل کی اسمگلنگ روکنے کے لیے دباؤ ڈالنے کی کوشش تھی۔

برطانوی میڈیا کے مطابق اب ان دونوں ٹیرف کو ملاکر چین پر عائد مجموعی ٹیرف 145 فیصد بن چکا ہے جو غیر معمولی طور پر بلند سطح ہے اور  اس کے اثرات نہ صرف امریکی صارفین بلکہ چینی معیشت پر بھی پڑ سکتے ہیں۔

گزشتہ روز امریکی صدر ڈونلڈ ٹرمپ نے تجارتی ٹیرف میں 90 روز کے وقفے اور چین کے لیے ٹیرف میں مزید اضافے کا اعلان کیا تھا۔

ٹرمپ نے اپنے بیان میں کہا تھاکہ وہ چین پر عائد تجارتی ٹیرف میں مزید اضافہ کرکے اسے 125 فیصد کررہے ہیں اور اس کا اطلاق فوری پر ہوگا۔ گزشتہ ہفتے عائد کیےگئے جوابی محصولات میں 90 دن کا وقفہ کررہے ہیں اور اس کا اطلاق بھی فوری طور پر ہوگا۔

وائٹ ہاؤس کی ترجمان کا کہنا تھا کہ کینیڈا اور میکسیکو سمیت دیگر ممالک پر عائد کیے گئے جوابی ٹیرف میں 90 روز کا وقفہ کیا گیا ہے جبکہ 10 فیصد بیس لائن ٹیرف بدستور لاگو رہے گا۔