پاکستان اور نائیجیریا کا سکیورٹی و دفاعی شعبوں میں تعاون بڑھانے کا عزم

چیئرمین جوائنٹ چیفس آف اسٹاف کمیٹی جنرل ساحر شمشاد مرزا کے دورہ نائیجیریا کے موقع پر دونوں ممالک نے سیکیورٹی و دفاعی شعبوں میں تعاون بڑھانے کے عزم کا اعادہ کیا ہے۔

پاک فوج کے شعبہ تعلقات عامہ (آئی ایس پی آر) کے مطابق چیئرمین جوائنٹ چیفس آف اسٹاف کمیٹی جنرل ساحر شمشاد مرزا سرکاری دورے پر نائجیریا میں موجود ہیں، جہاں انہوں نے نائجیرین عسکری اور سول قیادت سے اہم ملاقاتیں کیں۔

ترجمان پاک فوج کا کہنا تھا کہ ملاقاتوں میں انسداد دہشت گردی، پیشہ ورانہ تعاون اور دفاعی اشتراک پر تبادلہ خیال کیا گیا جب کہ دونوں ممالک نے سیکیورٹی اور دفاع کے شعبوں میں باہمی تعاون کو مزید مستحکم کرنے کے عزم کا اعادہ کیا۔

آئی ایس پی آر نے مزید بتایا کہ نائجیرین قیادت نے دہشت گردی کے خلاف پاک فوج کی قربانیوں کو زبردست خراج تحسین پیش کیا اور پاکستان کی مسلح افواج کی پیشہ ورانہ صلاحیتوں کا اعتراف کیا۔

آئی ایس پی آر نے بتایا کہ اس دورے کا مقصد دونوں ممالک کے مابین دفاعی اور سیکیورٹی تعاون کو مزید فروغ دینا ہے جب کہ جنرل ساحر شمشاد مرزا نے نائجیریا کے وزیر دفاع، چیف آف ڈیفنس اسٹاف اور نائجیرین آرمی، نیوی اور ایئر فورس کے سربراہان سے علیحدہ علیحدہ ملاقاتیں کیں۔