کٹھ پتلیوں کو بھگا کر کشمیر کو بچانا ہوگا : بلاول بھٹو زرداری

تفصیلات کے مطابق پیپلز پارٹی رہنما بلاول بھٹو نے  آزادکشمیر میں عوامی جلسے سے خطاب کرتے ہوئے  کہا کہ کشمیر کے جیالوں نے ذوالفقار علی بھٹو اور بے نظیر بھٹو کے ساتھ مل کر تاریخ رقم کی تھی۔  ٹی وی پر بیٹھے کہتے ہیں کہ پیپلز پارٹی ختم ہو چکی ہے ، ان سب لوگوں کو کہنا چاہتا ہوں کہ ذرا آنکھیں کھول کر عباس پور کے پہاڑوں کی طرف دیکھیں ،یہاں میری مائیں بہنیں اتنی بڑی تعداد میں پہنچی ہیں ،آپ کیسے کہہ سکتے ہو کہ پیپلز پارٹی ختم ہو چکی ہے ،پیپلز پارٹی کل بھی زندہ تھی ،  آج بھی زندہ ہے اور آنیوالے   کل میں بھی آپ کو پیپلز پارٹی ہی نظر آئے گی۔

انہوں نے کہاکہ  ہم میدان میں پہنچ چکے  ہیں   ،آپ جانتے ہیں کہ یہ الیکشن کتنے اہم ہیں ،تاریخ میں کشمیر کیلئے سب سے اہم ترین الیکشن ہے ،الیکشن میں آپ اپنے ووٹ کی طاقت سے بارڈر کے اس پار اور اس پار پیغام بھیجیں گے ۔ جب ہم کہے ہیں کشمیر پر سودا نا منظور ہے تو اس کا مطلب ہے کہ مقبوضہ کشمیر میں جو ہورہا ہے وہ نا منظور ہے۔

بلاول بھٹو زرداری نے کہا  کہ  ہم بھارتی وزیر اعظم نریندر مودی کی کامیابی کے لیے دعا نہیں مانگتے، مودی کو شادیوں میں شرکت کی دعوت نہیں دیتے کیونکہ ہم مقبوضہ کشمیر کے مسلمانوں کے ساتھ شانہ بشانہ کھڑے ہیں۔ جب تک آزاد کشمیر کے نوجوان کھڑے ہیں کسی کو اجازت نہیں دیں گے کہ وہ کشمیر پر سودے کا سوچے ۔

انہوں  نے کہا کہ مقبوضہ کشمیر کے مسلمانوں پر ظلم ہوتا ہے تو وزیر اعظم عمران خان بے بسی کے عالم میں کہتے ہیں کہ میں کیا کروں، ہمیں ذوالفقار علی بھٹو نے سکھایا ہے کہ ہزار سال جنگ لڑنی پڑے لڑیں گے لیکن کشمیر کو تنہا نہیں چھوڑیں گے، ہم مودی کی انکھوں میں آنکھیں ڈال کر جواب دینے کو تیار ہیں۔ ان کا مزید کہنا تھا کہ ہمیں محترمہ نے سکھایا کہ جہاں ہمارے کشمیری بہن بھائیوں کا پسینہ گرے گا وہاں ہمارا خون گرے گا ،تاریخ کا بڑا ظلم ہو اور ہمارا منہ توڑ جواب کیا ہے کہ کشمیر  ہائی وے کو سری نگر ہائی وے نام رکھ دیں۔ کشمیر کےعوام نے سب کو بھگتا ہے  ۔  

بلاول بھٹو نے کہاکہ ہم تین سال سے اس کٹھ پتلی کا مقابلہ کر رہے ہیں اور اپنے سیاسی مخالفین کوملنےجیل تک پہنچے، لیکن ہمارے سیاسی حلیف ساتھ مل کرکٹھ پتلی کوگرانےمیں سنجیدہ نہیں، ہم عمران کو ایک انچ کی بھی گنجائش نہیں دیں گے، ضمنی الیکشن میں ہم نے عمران خان کو شکست دی، جبکہ ہمارے دوست چاہتے تھے کہ ضمنی الیکشن عمران کو تحفے میں دیں، پاکستان پیپلز پارٹی کسی کے پاؤں نہیں پکڑےگی، آپ کہتے تھے آر یا پارہوگا، اب پاؤں پکڑ رہے ہو، نظریاتی سفرآرپارسے ہوتے ہوئے پاؤں پکڑنےتک پہنچ چکےہیں۔

انہوں نے حکومت پر تنقید کرتے ہوئے کہا کہ  عمران خان پورے پاکستان میں تبدیلی کا اصل چہرہ  سامنے لایا ہے ، تبدیلی کا اصل چہرہ تاریخی مہنگائی ، غربت  اور بے روزگاری ہے ،مہنگائی میں ہم افغانستان ، بنگلہ دیش ، بھارت سے بھی آگے ہیں ،50لاکھ گھر بنانے کا وعدہ کیا ،جس کے پاس چھت تھی اس سے چھین لی ،یہ امیروں کو ریلیف اور غریبوں کو تکلیف پہنچاتےہیں ۔

بلاول نے مزید کہا کہ ہمیں جب بھی حکومت ملی ہم نے غریب طبقے کا ساتھ دیا ،شہید بی بی نے روزگار دلوانے میں سارے ریکارڈ توڑ دیئے تھے ،پورے ملک میں لیڈی ہیلتھ ورکر کا نظام کھڑا کیا اور خواتین کو روزگار دیا ،عوام کو روزگار دلوانے سے معاشی بحران کا سامنا کر سکتے ہیں ۔ہم نے بینظیر انکم سپورٹ پروگرام میں لوگوں تک پیسہ پہنچایا،ہم نے تنخواہوں میں ریکارڈ اضافہ کیا ،25جولائی کو آپ جیالےوزیراعظم کومنتخب کریں گے ،بجٹ میں ہمارا پہلاکام  تنخواہوں میں اضافہ ہوگا۔ 

واضح رہے کہ آزاد کشمیر قانون ساز اسمبلی کے لیے عام انتخابات 25 جولائی کو ہوں گے اور اس حوالے سے سیاسی جماعتوں کی جانب سے انتخابی مہم چلائی جا رہی ہے۔ انتخابات کے سلسلے میں امیدواروں کی حتمی فہرست جاری کر دی جس کے تحت کُل 724 امیدوار حصہ لیں گے۔