وزیر خارجہ اسحاق ڈار اعلی سطحی وفد کے ہمراہ کابل پہنچ گئے

کابل:نائب وزیراعظم و وزیر خارجہ اسحاق ڈار نے افغانستان کے سرکاری دورے کے دوران افغان وزارت خارجہ کا دورہ کیا، جہاں ان کا استقبال افغان وزیر خارجہ مولوی امیر خان متقی نے کیا۔
اس موقع پر دونوں وزرائے خارجہ کے درمیان اہم مذاکرات ہوئے جن میں پاکستان اور افغانستان کے مابین تاریخی تعلقات کو مزید مضبوط بنانے، باہمی تعاون اور خطے میں امن و استحکام کے امور پر تبادلہ خیال کیا گیا۔
اس سے قبل افغانستان روانگی کے موقع پر نور خان ایئر بیس پر میڈیا سے بات چیت کرتے ہوئے اسحاق ڈار نے کہا کہ افغانستان کے ساتھ ہمارے برادرانہ تعلقات ہیں، افغانستان ہمارا ہمسایہ ملک ہے، کوشش ہو گی کہ دونوں ممالک مل کر کام کریں۔
انہوں نے مزید کہا ہے کہ کچھ عوصے سے دونوں ممالک کے درمیان سرد مہری رہی ہے، وزیراعظم سمیت سب نے فیصلہ کیا ہے کہ افغانستان کیساتھ بات چیت کی جائے
دوسری جانب ترجمان دفتر خارجہ شفقت علی خان کا کہنا ہے کہ یہ دورہ نہایت اہمیت کا حامل ہے، دورے کے دوران پاک افغان وفود افغانستان میں سیکیورٹی کی صورتحال پر بات چیت کریںگے۔
واضح رہے کہ گزشتہ روز افغانستان حکومت کے نمائندہ وفد نے وزیر مملکت داخلہ طلال چوہدری اور سیکریٹری داخلہ محمد خرم آغا سے بھی ملاقات کی تھی۔ جس میں ٹرانزٹ ٹریڈ اور افغان باشندوں کی وطن واپسی سمیت مختلف امور پر تفصیلی تبادلہ خیال کیا گیا تھا۔