بھارت نے پہلگام کے حالیہ واقعے پر سیکیورٹی ناکامی کا اعتراف کر لیا

بھارت کے وزیرداخلہ راج ناتھ سنگھ نے مقبوضہ کشمیر کے سیاحتی علاقے پہلگام میں حالیہ واقعے پر سیکیورٹی ناکامی کا اعتراف کیا ہے۔

بھارتی میڈیا کے مطابق راج ناتھ سنگھ نے اس بات کا اظہار کیا کہ پہلگام میں پیش آنے والے واقعے کو سیکیورٹی کی ناکامی قرار دیتے ہوئے کہا کہ یہ واقعہ بھارتی حکومت کی انٹیلی جنس کی کمزوری کو ظاہر کرتا ہے۔

بھارتی وزیرداخلہ کا کہنا تھا کہ یہ واقعہ ہماری سیکیورٹی کی ناکامی ہے اور ہم اس پر مکمل تحقیقات کر رہے ہیں تاکہ اس طرح کی صورتحال دوبارہ نہ ہو، تاہم، بھارتی اپوزیشن جماعتوں نے اس بیان پر شدید ردعمل ظاہر کرتے ہوئے بھارتی حکومت کی انٹیلی جنس اور سیکیورٹی اداروں کی کارکردگی پر سوالات اٹھائے ہیں۔

کانگریس کی سربراہ سونیا گاندھی کے داماد رابرٹ وڈرا نے بھی پہلگام واقعے پر مودی سرکار کو آڑے ہاتھوں لے لیا۔

بھارتی میڈیا کے مطابق پریانکا گاندھی کے شوہر رابرٹ وڈرا نے ہندوتوا پالیسی کو تنقید کا نشانہ بناتے ہوئے کہا کہ جب نفرت آمیز نظریات کا پرچار کیا جائے گا تو اس کا ردعمل بھی سخت آتا ہے۔

یہ فالس فلیگ آپریشن واقعہ مقبوضہ کشمیر کے پہلگام علاقے میں پیش آیا، جس میں 26 سیاح جاں بحق ہوئے تھے۔ بھارتی اپوزیشن کی جانب سے وزیر داخلہ کی ناکامی کے اعتراف کو حکومت کی سیکیورٹی حکمت عملی پر سوالیہ نشان قرار دیا جا رہا ہے۔

 اپوزیشن رہنماؤں نے حکومت پر تنقید کرتے ہوئے کہا کہ اس طرح کی ناکامیوں سے بھارتی شہریوں کی زندگی خطرے میں پڑ جاتی ہے۔