لالی وڈ فلم ساز محمد علی ایک دفعہ پھر ایمی ایوارڈ کے لیے نامزد

لاہور: پاکستان کے معروف فلم ساز محمد علی نقوی کو ایک بار پھر ایمی ایوارڈ کے لیے نامزد کرلیا گیا ہے۔
تفصیلات کے مطابق فلم ساز محمد علی نقوی کو اس بار ان کی دستاویزی فلم "ٹرننگ پوائنٹ: دی بمب اینڈ دی کولڈ وار کے ذریعے نامزد کیا گیا ہے ، جسے بہترین تاریخی دستاویزی فلم کی کیٹیگری میں جگہ دی گئی ہے۔
خیال رہے کہ محمد علی نقوی کی ایمی ایوارڈ کےلیے یہ چوتھی نامزدگی ہے،اس سے قبل وہ2023 میں پرائم ٹائم ایمی میں نامزدگی حاصل کر نے والے وہ پہلے پاکستانی تھے۔
اس موقع پر فلمساز محمد علی نقوی نے ایمی ایوارڈمیں نامزدگی کو اپنے لیے اعزاز قرار دیتے ہوئے کہا کہ ایمی ایوارڈ کےلیے ایک بار پھر نامزد ہونا ان کے لیے بہت بڑا اعزاز ہے،ان کا کہنا تھا کہ بین الاقوامی سطح پر سرحدوں سے پار تک کہانیاں پہنچانا ایک ایسا اعزاز ہے جسے وہ ہلکا نہیں لیتے۔
واضح رہے کہ ایمی ایوارڈ (Emmy Award) ایک معتبر امریکی ایوارڈ ہے جو ٹیلی ویژن کی دنیا میں نمایاں کارکردگی پر دیا جاتا ہے، بالکل ویسے ہی جیسے فلموں کے لیے آسکر ایوارڈ اور موسیقی کے لیے گریمی ایوارڈ ہوتے ہیں۔