مسلم لیگ (ن) کے سینیٹر اور مرکزی صدر جمیعت اہل حدیث پروفیسرساجد میر انتقال کر گئے

لاہور: پاکستان مسلم لیگ (ن) کے سینیٹر اور مرکزی صدر جمعیت اہل حدیث پروفیسر ساجد میر انتقال کر گئے۔
خاندانی ذرائع کے مطابق مہرے کے آپریشن کی وجہ سے ان کی طبیعت ناساز رہتی تھی، اس سے قبل دل کی تکلیف ہونے پر ان کا بائی پاس بھی کروایا گیا تھا۔
ساجد میر 2 اکتوبر 1938 کو سیالکوٹ میں پیدا ہوئے ،ان کی عمر 88 سال تھی، انہوں نے یونیورسٹی آف پنجاب لاہور سے اپنی تعلیم مکمل کی۔
پروفیسر ساجد میرمسلم لیگ ن کے ٹکٹ پر 2003 سے 2025 تک مسلسل سینیٹر رہے اور اس سے قبل بھی وہ 1994 سے 2000 تک بھی ایوان بالا کے رکن رہے، وہ ایک عظیم دینی، علمی، اور سیاسی شخصیت تھے۔
مرحوم کا پاکستان اور سعودی عرب کے درمیان تعلقات کی مضبوطی میں بھی نمایاں کردار رہا۔ساجد میر مرکزی جماعت اہل حدیث پاکستان کے امیر بھی تھے اور وہ سینیٹ کی قائمہ کمیٹی برائے سائنس اینڈ ٹیکنالوجی کے چیئرمین کی بھی خدمات انجام دے رہے تھے۔
وزیرِ اعظم کا اظہار افسوس
وزیرِ اعظم محمد شہباز شریف نے امیر جمیعتِ اہل حدیث، سینیٹر پروفیسر ساجد میر کے انتقال پر گہرے دکھ اور رنج کا اظہار کیا اور بلندی درجات اور انکے اہل خانہ کیلئے صبر کی دعا کی۔ 
وزیرِاعظم نے کہا کہ ساجد میر پاکستان کی اہل بصیرت سیاسی شخصیت اور دینی اسکالر تھے جنکی رحلت سے پاکستان کے سیاسی منظر نامے میں ایک ایسا خلاء پیدا ہوگیا جو شاہد ہی کبھی پُر ہو سکے۔
شہباز شریف نے کہا کہ ساجد میر نے ہمیشہ انتہاء پسندی اور فرقہ واریت کے خلاف آواز اٹھائی، جو انکی سیاست و دین کی خدمات کا سنہری باب ہے۔
انہوں نےمزید کہا کہ مشکل کی اس گھڑی میں مجھ سمیت پوری قوم کی ہمدریاں ساجد میر کے اہل خانہ کے ساتھ ہیں۔
حافظ نعیم الرحمن کا اظہار افسوس
امیر جماعت اسلامی پاکستان حافظ نعیم الرحمن  نے امیر جمعیت اہلحدیث پاکستان پروفیسر ساجد میر کے انتقال پر اظہار افسوس کیا اور کہا کہ پروفیسر ساجد میر کی ملی قومی خدمات ہمیشہ یاد رکھی جائیں گی۔
حافظ نعیم  نے کہا کہ مرکزی جمعیت اہلحدیث کے ذمہ داران وکارکنان سے تعزیت کرتے ہیں۔