پاک بھارت کشیدگی کے باعث وفاقی حکومت کا قومی قیادت کو اعتماد میں لینے کا فیصلہ

 پاکستان اور بھارت کے درمیان بڑھتی ہوئی کشیدگی کے پیش نظر وفاقی حکومت نے تمام سیاسی جماعتوں کے سرکردہ رہنماؤں کو قومی سلامتی کی صورتحال پر اعتماد میں لینے کا فیصلہ کیا ہے۔

ترجمان وزارت اطلاعات کے مطابق وزیر اطلاعات عطا اللہ تارڑ اور ڈی جی آئی ایس پی آر لیفٹیننٹ جنرل احمد شریف چوہدری منگل کو سیاسی جماعتوں کے قائدین کو ایک اہم بیک گراؤنڈ بریفنگ دیں گے۔

وزارتِ اطلاعات کے ترجمان نے اس اقدام کو قومی یکجہتی اور اتحاد کی ایک اعلیٰ مثال قرار دیتے ہوئے کہا کہ موجودہ حالات میں تمام سیاسی قیادت کو ایک صفحے پر لانا انتہائی اہمیت رکھتا ہے۔

ترجمان نے بتایا کہ اس بریفنگ میں پاکستان اور بھارت کے درمیان موجودہ قومی سلامتی کی صورتحال، اس کے ممکنہ مضمرات، افواج پاکستان کی دفاعی تیاریوں، سفارتی اقدامات اور ریاستی مؤقف سے متعلق آگاہی دی جائے گی۔