بھارتی اداکار پراکاش راج فواد خان کی فلم ابیر گلال پر پابندی کے خلاف بول پڑے

معروف بھارتی اداکار اور سیاستدان پراکاش راج نے پاکستانی سپر اسٹار فواد خان کی بالی ووڈ فلم ابیر گلال کی ریلیز پر پابندی کے خلاف بول پڑے۔

بھارتی میڈیا سے گفتگو کرتے ہوئے پراکاش راج نے کہا کہ کسی بھی فلم کو محض اس بنیاد پر نشانہ بنانا کہ اُس میں پاکستانی اداکار شامل ہے، انصاف کے تقاضوں کے منافی ہے۔ جب تک کسی فلم میں بچوں کے ساتھ زیادتی، فحاشی یا معاشرے کے لیے نقصان دہ مواد شامل نہ ہو، اس پر پابندی لگانا تخلیقی آزادی پر حملہ ہے۔

پراکاش راج نے مزید کہا کہ اختلافِ رائے کو سننے اور برداشت کرنے کا حوصلہ پیدا کیا جانا چاہیے، نہ کہ فنکاروں کی تخلیقات اور اظہارِ رائے کو دبایا جائے۔ ان کا کہنا تھا کہ فن اور سیاست کو الگ رکھنا وقت کی ضرورت ہے۔

یاد رہے کہ فواد خان اور وانی کپور کی فلم ابیر گلال کو بھارت میں تنازع کا سامنا ہے، اور اس کی ریلیز پر پابندی عائد کی جا چکی ہے اس کے علاوہ، بھارتی حکام کی جانب سے فلم سے وابستہ فنکاروں کے انسٹاگرام اکاؤنٹس بھی بند کیے جا رہے ہیں، جس پر فلمی اور ادبی حلقوں میں تشویش کی لہر دوڑ گئی ہے۔