امریکی صدر کا تمام بین الاقوامی فلموں پر 100 فیصد ٹیرف عائد کرنے کا اعلان

امریکی صدر ڈونلڈ ٹرمپ نے امریکا سے باہر بننے والی تمام فلموں پر 100 فیصد ٹیرف عائد کرنے کا اعلان کردیا۔

رپورٹ کے مطابق امریکی صدر نے اپنے سوشل میڈیا پلیٹ فارم پر پوسٹ کرتے ہوئےدیگر ممالک کو تنقید کا نشانہ بنایا جنہوں نے امریکی اسٹوڈیوز اور فلم سازوں کو اپنی طرف راغب کرنے کے لیے کشش انگیز مراعات فراہم کیں۔

ٹرمپ کا کہنا تھا کہ امریکی فلم انڈسٹری (ہالی ووڈ انڈسٹری) تیزی سے دم توڑ رہی ہے۔ انہوں نے مزید کہا کہ یہ دوسرے ممالک کی طرف سے ایک منظم کوشش ہے اور اس لیے یہ ایک قومی سلامتی کا خطرہ ہے۔ ٹرمپ نے اس بات پر بھی زور دیا کہ “یہ سب کچھ پیغامات اور پروپیگنڈہ کے علاوہ کچھ نہیں ہے!

ان کا کہنا تھا کہ ان پرکشش پیشکش کے سبب دیگر ممالک کی جانب سے ہالی ووڈ کو نقصان پہنچ رہا ہے، یہ امریکی سلامتی کےلیے خطرے کے مترادف ہے۔

امریکی صدر نے امریکہ میں فلمیں بنانے کا مطالبہ کیا اور کہا کہ محکمہ تجارت کو غیر ممالک میں بننے والی تمام فلموں پر 100 فیصد ٹیرف عائد کرنے کی اجازت دے رہا ہوں، جو فوری نافذ العمل ہوگا۔

تاہم، ہالی وڈ کو زندہ کرنے کے بجائے، یہ ٹیریف ممکنہ طور پر الٹا اثر ڈال سکتے ہیں اور بڑے اسٹوڈیوز جیسے کہ ڈزنی، پیرا ماؤنٹ اور وارنر بروس کو مزید نقصان پہنچا سکتے ہیں۔

سی این این کی رپورٹ کے مطابق ایسا اس لیے ہو سکتا ہے کہ بہت سی امریکی فلمیں بیرون ملک اس لیے بنائی جاتی ہیں تاکہ ٹیکس کی رعایتیں اور کم مزدوری کے اخراجات کا فائدہ اٹھایا جا سکے۔

واضح رہے کہ چند روز قبل چین نے بھی امریکی صدر ڈونلڈ ٹرمپ کی جانب سے عائد محصولات میں اضافے کے خلاف جوابی کارروائی کرتے ہوئے ہالی ووڈ فلموں کی درآمدات پر فوری پابندی عائد کرنے کا اعلان کر دیا تھا۔