پہلگام واقعہ: قومی اسمبلی میں بھارتی جارحیت اور یکطرفہ اقدامات کیخلاف قرارداد منظور

اسلام آباد:قومی اسمبلی اجلاس میں پہلگام فالس فلیگ حملے کے بعد بھارتی جارحیت اور غیر قانونی یکطرفہ اقدامات کے خلاف مذمتی قرارداد ایوان میں پیش کی گئی جسے متفقہ طور پر منظور کر لیا گیا ہے۔
تفصیلات کے مطابق قومی اسمبلی نے پہلگام واقعے کے بعد بھارتی غیر قانونی یکطرفہ اقدامات کے خلاف مذمتی قرارداد متفقہ طور پر منظور کر لی۔
 قرارداد وفاقی وزیر پارلیمانی امور طارق فضل چودھری کی جانب سے پیش کی گئی۔
قرارداد میں کہا گیا پاکستان ہر قسم کی دہشتگردی کی مذمت کرتا ہے،پاکستان بھارت کی جانب سے لگائے گئے الزامات کو مسترد کرتاہے،پاکستان کا پانی روکا گیا تو یہ اعلان جنگ ہوگا۔
قرارداد میں کہا گیا کہ ایوان پاکستان میں دہشت گردی کی تمام شکلوں اور بھارتی غیر قانونی مقبوضہ کشمیر کے پہلگام میں دہشت گردانہ حملے کے بعد بھارتی اقدامات کی مذمت کرتا ہے۔
قرارداد میں یہ بھی بتایا گیا کہ یہ ایوان بھارت کے یکطرفہ اقدامات اور آبی جارحیت کی مذمت کر تے ہوئے ممکنہ عسکری اور آبی جارحیت کا مقابلہ کرنے کے عزم کا اعادہ کرتا ہے۔
علاوہ ازیں قرارداد میں بھارت کو دہشت گردانہ سرگرمیوں میں ملوث ہونے کے لئے جوابدہ ٹھہرایا جائے۔