بھارتی حملے میں شہید ہونیوالے 7 سالہ ارتضیٰ عباس کی نماز جنازہ ادا

اسلام آباد: بھارت کی بلااشتعال فائرنگ سے شہید ہونے والے 7سالہ ارتضیٰ عباس طوری کی نماز جنازہ ادا کر دی گئی۔
پاک فوج کے شعبہ تعلقات عامہ(آئی ایس پی آر) کے مطابق ارتضیٰ عباس طوری لیفٹیننٹ کرنل ظہیر عباس طوری کے صاحبزادے تھے۔
نماز جنازہ میں صدر مملکت آصف علی زرداری، وزیراعظم شہباز شریف، نائب وزیراعظم و وزیر خارجہ اسحاق ڈار، وفاقی وزرا، آرمی چیف جنرل عاصم منیر سمیت تینوں سروسز چیف، حاضر سروس اور ریٹائرڈ فوجی افسران، سرکاری حکام اور دیگر شعبہ ہائے زندگی سے تعلق رکھنے والے افراد کی بڑی تعداد نے شرکت کی۔

اس موقع پر وزیراعظم شہباز شریف نے بھارت کی بلااشتعال جارحیت کی شدید مذمت کرتے ہوئے کہا کہ بزدل بھارت نے معصوم بچوں، خواتین اور بزرگوں سمیت نہتے شہریوں کو نشانہ بنایا، جو بھارتی حکومت کی انسان دشمن اور بزدلانہ سوچ کی عکاسی کرتا ہے۔
انہوں نے مزید کہا کہ بھارتی جارحیت نے علاقائی و عالمی امن کو شدید خطرے میں ڈال دیا ہے۔

صدر مملکت اور وزیراعظم نے شہداء کے بلند درجات کے لیے دعا کی۔ ان کا کہنا تھا کہ بین الاقوامی قوانین کی خلاف ورزیاں ناقابلِ قبول، بھرپور جواب دیا جائے گا۔
آئی ایس پی آر کے مطابق پاک فوج بھارتی اشتعال انگیزی کا مقابلہ کرنے کے لیے مکمل طور پر تیار ہے اور کسی بھی جارحیت کا بھرپور جواب دینے کے لیے پرعزم ہے۔
قومی قیادت نے شہید ارتضیٰ عباس سمیت بھارتی جارحیت میں شہید ہونے والوں کے درجات کی بلندی اور ان کے ورثا کے لیے صبر جمیل کی دعا کی۔