بھارت کے لیے بڑا دھچکا،امریکی صدر کا ایپل کمپنی کوبھارت میں پلانٹ کانہ لگانے کا مشورہ

واشنگٹن: امریکی صدر ڈونلڈ ٹرمپ نے ایپل کے چیف ایگزیکٹو ٹم کک سے کہا ہے کہ وہ نہیں چاہتے کہ ٹیکنالوجی کمپنی اپنی پراڈکٹس بھارت میں تیار کرے۔
تفصیلات کے مطابق امریکی صدر ڈونلڈ ٹرمپ کا کہنا ہے کہ بھارت میں ٹیرف کی شرح بہت زیادہ ہے،ایپل کمپنی بھارت میں پلانٹ نہ لگائے۔
امریکی صدر نے کہا کہ میں نے ٹم کک سے کہا کہ ہم نے آپ کے ساتھ بہت اچھا سلوک کیا اور چین میں جو پلانٹس آپ نے تعمیر کیے انہیں قبول کیا، مگر ہم بھارت میں ان کی تعمیر میں دلچسپی نہیں رکھتے، بھارت اپنا خیال خود رکھ سکتا ہے۔
امریکی میڈیا سے گفتگو میں انہوں نے کہا کہ سی ای او ایپل بھارت کے بجائے امریکا میں پیداوار بڑھانے پرزوردیں ۔
ڈونلڈ ٹرمپ نے مزید کہا کہ ایپل کی جانب سے امریکا میں پروڈکشن کو بڑھایا جائے گا، تاہم انہوں نے مزید تفصیلات نہیں بتائیں۔
دوسری جانب ایپل کی جانب سے فی الحال امریکی صدر کے بیان پر کوئی ردعمل ظاہر نہیں کیا گیا۔