کے پی میں علی بابا چالیس چوروں کی حکومت ہے، اربوں روپے کے اسکینڈلز سامنے آرہے ہیں،فیصل کریم

پشاور:گورنر خیبر پختونخوا فیصل کریم کنڈی کا کہنا ہے کہ خیبر پختونخوا میں علی بابا چالیس چوروں کی حکومت ہے،صوبے میں اربوں روپے کے اسکینڈلز سامنے آرہے ہیں۔
پشاور میں میڈیا سے گفتگو کرتے ہوئے فیصل کریم کنڈی کا کہنا تھا کہ ایک سال پہلے کہا تھا صوبائی حکومت کرپشن کررہی ہے، اس صوبے میں سولر پینل میں بھی 16 ارب روپے کا سکینڈل ہے جب کہ آج 19 ارب کا نیا کیس سامنے آیا۔
 انہوں نے کہا کہ خیبر پختونخوا میں علی بابا چالیس چوروں کی حکومت ہے،صوبے میں اربوں روپے کے اسکینڈلز نکلتے جا رہے ہیں،ان کی جگہ کوئی اور پارٹی کرپشن کرتی تو گرفتاریاں ہو چکی ہوتیں۔
گورنر فیصل کریم کنڈی نے مزید کہا کہ پی ٹی آئی حکومت کی کرپشن کے سہولت کار اسلام آباد میں بیٹھے ہیں، خیبر پختونخوا کا 12 سال کا بجٹ کرپشن میں چلا گیا، خیبرپختونخوا حکومت میں جو بھی کرپٹ ہے اس کوفوری گرفتار کیا جائے۔
میڈیا سے گفتگو میں انہوں نے کہا کہ ریاست نے وعدہ کیا تھا ضم اضلاع میں 100 ارب خرچ کیا جائے گا، مگر 6 سے 7 ارب ملتا ہے اگر گورنر کے پاس اختیار ہوتا تو اب تک ان کو الٹا ٹانگ چکا ہوتا،جن لوگوں نے ٹیکس پیئر کے پیسے کھائے ان کو سزا ہونی چاہئے۔
فیصل کریم کنڈی کا کہنا تھا کہ جس طرح چیرمین بلاول بھٹو زرداری نے پاک بھارت کشیدگی میں کردار ادا کیا، سب کے سامنے ہے، اب وہ وفد لیکر دنیا میں پاکستان کا مقدمہ لڑنے جارہے ہیں۔