قلعہ عبداللہ: گلستان بازار میں دھماکےسے 4 افراد جاں بحق، متعدد زخمی

قلعہ عبداللہ: بلوچستان کے ضلع قلعہ عبداللہ میں خود کش دھماکے کے نتیجے میں 4 افراد جاں بحق جبکہ متعددزخمی ہو گئے ہیں۔
لیویز ذرائع کے مطابق دھماکا جبار مارکیٹ کے قریب ہوا، دھماکے میں متعدد افراد زخمی ہوئے،دھماکہ اس قدر شدید تھا کہ جبار مارکیٹ کی متعدد دکانیں زمین بوس ہو گئیں جبکہ قریب کھڑی گاڑیاں بھی مکمل طور پر تباہ ہو گئیں۔ 
عینی شاہدین کے مطابق دھماکے کی آواز دور دور تک سنی گئی، جس کے باعث علاقے میں شدید خوف و ہراس پھیل گیا۔
لیویز ذرائع کا کہنا ہےکہ دھماکے سے جبار مارکیٹ کی متعدد دکانیں گرگئیں، دھماکے کے باعث کئی دکانوں میں آگ بھی لگ گئی۔
ریسکیوحکام کے مطابق زخمیوں میں بعض کی حالت تشویشناک بتائی جا رہی ہے،جن کو علاج کے لیے قریبی اسپتال منتقل کر دیا گیا ہے۔
واقعے کے فوراً بعد سیکیورٹی فورسز نے علاقے کا محاصرہ کر لیا اور جائے وقوعہ کو سیل کر کے سرچ اور کلیئرنس آپریشن شروع کر دیا گیا ہے۔
دوسری جانب ڈپٹی کمشنر کا کہنا ہے کہ ایف سی قلعےکی عقبی دیوار کے ساتھ مارکیٹ بھی ہے، دھماکےکے بعد مسلح افراد اور ایف سی اہلکاروں میں فائرنگ کا تبادلہ بھی ہوا ہے، دھماکے سے قریبی مارکیٹ میں زیادہ جانی ومالی نقصان ہوا ہے، علاقے میں ہیلتھ سہولیات کی کمی کے باعث زخمیوں کو کوئٹہ منتقل کیا جا رہا ہے۔
ڈپٹی کمشنر کا کہنا تھا کہ دھماکے کے وقت قبائلی رہنما حاجی فیض اللہ خان غبیزئی اپنے دفتر میں موجود تھے تاہم  وہ محفوظ رہے، زخمیوں میں قبائلی رہنما حاجی فیض اللہ غبیزئی کے گارڈ اور راہ گیرشامل ہیں۔