بھارتی کرکٹ بورڈ نے ایشیا کپ سے دستبرداری کی خبروں کو مسترد کر دیا

نئی دہلی: بھارتی کرکٹ بورڈ نے ایشیا کپ سے دستبرادری کے انڈین دعوں کو مسترد کرتے ہوئے اسے بے بنیاد قرار دے دیا ۔
اس حوالے سے بی سی سی آئی کے سیکرٹری دیواجیت نے ایشیا کپ سے دستبرداری کی خبروں کو بے بنیاد قرار دے دیا، انہوں نےکہاکہ  بھارتی میڈیا میں چلنے والی خبروں میں کوئی صداقت نہیں، ابھی تک ایشیا کپ یا ویمنز ایمرجنگ ایشیا کپ پر کوئی بات چیت نہیں ہوئی۔
دیواجیت سیکیا نے کہا کہ نہ کوئی فیصلہ ہوا، نہ ہی اے سی سی کو کوئی خط لکھا گیا، ایشیا کپ سے متعلق خبریں قیاس آرائی پر مبنی اور خیالی ہیں۔ 
اپنے بیان میں سیکرٹری بی سی سی آئی نے مزید کہا کہ فی الحال بی سی سی آئی کی تمام توجہ آئی پی ایل اور انگلینڈ سیریز پر ہے۔
انہوں نےکہا کہ اے سی سی ایونٹس پر کوئی بھی فیصلہ وقت آنے پر باقاعدہ اعلان کے ساتھ کیا جائے گا۔
خیال رہے کہ اس سے قبل  بھارتی میڈیا کی جانب سے دعویٰ کیاگیا تھا کہ بھارت نے پاکستان کے ساتھ بڑھتی ہوئی کشیدگی کے پیش نظر اے سی سی کے تمام ایونٹس سے دستبرداری کا فیصلہ کیا ہے۔
اپنے دعوے میں بھارتی میڈیا نے مزید کہا بھارتی کرکٹ بورڈ نے ایشیا کپ اور ویمن ایمرجنگ ایشیا کپ نہ کھیلنے کا فیصلہ کیا ہے۔
جبکہ میڈیا رپورٹس میں مزید کہا گیا تھا کہ بھارتی کرکٹ بورڈ کا کہنا ہے کہ ایشین کرکٹ کونسل کو زبانی طور پر آگاہ کر دیا، ایسے ٹورنامنٹ کا حصہ نہیں بن سکتے جس کے سربراہ پاکستانی وزیر ہیں۔
خیال رہے کہ اس وقت ایشین کرکٹ کونسل(اے سی سی) کے سربراہ محسن نقوی ہیں۔
واضح رہے کہ ایشیا ءکپ رواں سال ستمبر میں بھارت اور ویمن ایمرجنگ ایشیاءکپ جون میں سری لنکا میں شیڈول ہے ۔