پاکستان نے بٹ کوائن مائننگ اور اے آئی کیلئے 2000 میگاواٹ بجلی مختص کر دی

اسلام آباد: پاکستان نے بٹ کوائن مائننگ اور مصنوعی ذہانت (اے آئی) کے ڈیٹا سینٹرز کے لیے 2000 میگاواٹ بجلی مختص کرکے ڈیجیٹل معیشت کی جانب ایک تاریخی قدم اٹھایا ہے۔
وزارت خزانہ کے مطابق یہ اقدام نیشنل ڈیجیٹل انفراسٹرکچر پروجیکٹ کے پہلے مرحلے کا حصہ ہے جس کا مقصد معیشت کو جدید خطوط پر استوار کرنا ہے۔
حکام نے بتایا کہ اضافی بجلی کو جدید ٹیکنالوجی کا استعمال کرتے ہوئے بٹ کوائن مائننگ، اے آئی ڈیٹا پروسیسنگ اور دیگر ہائی ٹیک منصوبوں کو فروغ دینے کے لیے استعمال کیا جائے گا۔ اس اہم منصوبے کی نگرانی پاکستان کرپٹو کونسل کرے گی۔
حکام کے مطابق اس منصوبے سے نہ صرف ملکی ٹیکنالوجی کے شعبے کو تقویت ملے گی بلکہ غیر ملکی سرمایہ کاروں کو پاکستان کی طرف راغب کرنے کے ساتھ ساتھ ٹیکنالوجی کے شعبے میں ہزاروں نوجوانوں کے لیے روزگار کے نئے مواقع پیدا ہوں گے۔
اقتصادی ماہرین کا کہنا ہے کہ بٹ کوائن مائننگ اور مصنوعی ذہانت جیسے  شعبوں میں سرمایہ کاری سے نہ صرف ملکی معیشت کو وسعت ملے گی بلکہ قومی سلامتی کو بھی نئی جہتیں ملیں گی۔ ان کے مطابق ڈیجیٹل انفراسٹرکچر کی ترقی ملک کو آزادی، کارکردگی اور پائیدار ترقی کی راہ پر گامزن کرے گی۔
حکومت کا مؤقف ہے کہ اس اقدام سے پاکستان ٹیکنالوجی کی عالمی دوڑ میں مؤثر انداز میں شریک ہو سکے گا اور مستقبل کی ڈیجیٹل دنیا میں ایک مضبوط اور خودمختار مقام حاصل کرے گا۔