حماس کا جنگ بندی معاہدے کے نئے دور کے آغاز پر آمادگی کا اظہار

فلسطین کی مزاحمتی تنظیم حماس کی جانب سے جنگ بندی معاہدے کے نئے دور کے آغاز پر آمادگی ظاہر کردی گئی ہے۔

میڈیا رپورٹس کے مطابق حماس نے کہا کہ جنگ بندی کیلئے مذاکرات کا نیا دور شروع کرنے کیلئے تیار ہیں۔

حماس کا کہنا تھا کہ ایسے معاہدے کیلئے تیار ہیں جو مستقل جنگ بندی کا سبب بنے۔ غزہ سے اسرائیلی فوج کا مکمل انخلا چاہتے ہیں، ہم ایسے معاہدے کے خواہشمند ہیں جس سے فلسطینیوں کو ریلیف ملے اور انسانی المیہ ختم ہو۔

دوسری جانب اسرائیل کی غزہ میں دہشت گردی جاری ہے۔عرب میڈیا کے مطابق غزہ سٹی میں امدادی سامان کے سینٹر پر فائرنگ سے مزید 54 فلسطینی شہید اور 136 زخمی ہوگئے۔ آدم خور صہیونی فوج نے پناہ گزینوں اور نہتے فلسطینیوں کو نشانہ بنایا۔

اقوام متحدہ کا کہنا ہے 18 مارچ سے اب تک سوا 6 لاکھ سے زائد فلسطینی دربدر ہوچکے ہیں۔ جبکہ شہدا کی مجموعی تعداد 54 ہزار سے تجاوز کرگئی ہے۔