عیدالاضحیٰ کا دوسرے روز ، سنتِ ابراہیمی کی ادائیگی جوش و جذبے سے جاری

ملک بھر میں عیدالاضحیٰ کے دوسرے روز بھی سنتِ ابراہیمی کی ادائیگی جوش و جذبے سے جاری ہے۔ شہروں، قصبوں اور دیہی علاقوں میں لوگ چھوٹے بڑے جانوروں کی قربانی کرتے نظر آ رہے ہیں۔ قربانی کے بعد گوشت کے حصے کیے جا رہے ہیں، جو رشتہ داروں، مستحقین اور ہمسایوں میں تقسیم کیے جا رہے ہیں۔ قربانی کا یہ سلسلہ کل تک جاری رہے گا،

دعوتیں، بیٹھکیں، ہنسی مذاق، اور پرلطف کھابوں کا سلسلہ زوروں پر ہے۔ خواتین کچن میں اپنی مہارت کا جادو جگا رہی ہیں۔ کہیں بریانی کی خوشبو فضا میں گھل رہی ہے تو کہیں ہنٹر بیف، مٹن سجی، قورمہ، سیخ کباب، کوفتے اور کڑاہی مہمانوں کا دل لبھانے کو تیار ہیں۔

پشاور کے فوارہ چوک پر عید کی خوشبو کچھ خاص ہے۔ یہاں عوام کا رش صبح سے ہی دیکھنے میں آیا، جہاں قربانی کے بعد لوگ ناشتہ کرنے پہنچے۔ روایتی پکوانوں جیسے چنے، نہاری، حلوہ پوری، اور سری پائے کا خوب مزہ لیا جا رہا ہے۔

رائے ونڈ میں ایک بڑے مذہبی ادارے کی طرف سے اجتماعی قربانی کا اہتمام کیا گیا، جہاں پچیس گائیں ذبح کی گئیں۔ قربانی کے اس روحانی منظر نے عوام کے دلوں کو گرما دیا۔

اگرچہ عوام خوشی منانے میں مصروف ہیں، لیکن کئی شہروں میں حکومتی دعووں کے باوجود سڑکوں پر آلائشوں کے ڈھیر نظر آئے۔ صفائی کی ناقص صورتحال نے عید کی خوشیوں میں خلل ڈالا، جس پر شہریوں نے شکایت کی کہ متعلقہ ادارے اپنی ذمہ داریاں پوری طرح ادا نہیں کر سکے۔

مجموعی طور پر عیدالاضحیٰ کا دوسرا دن خوشیوں، عقیدت، مہمان نوازی، ذائقے اور رنگوں کا حسین امتزاج لیے ہوئے ہے۔